TODAS ang lalaking nakipagtalo sa kanyang kumpare sa Quezon City noong Miyerkules ng gabi.

Sa report ng Criminal Investigation and Detection Unit ng Quezon City Police District (CIDU-QCPD), naganap ang insidente sa harap ng bahay ng biktima sa Brgy. Sto. Domingo, Quezon City bandang alas-9:00 ng gabi.

Batay sa imbestigasyon ni P/SSg Erwin Jay Mendez, isang residente ang nagsabi na nakita niyang nagtatalo ang biktima at suspek.

Biglang bumunot umano ng patalim ang suspek at sinaksak ang biktima sa dibdib saka tumakas sakay ng motorsiklo.

Dinala ang biktima sa Quezon City General Hospital pero namatay din bandang alas-9:36 ng gabi.