BILANG pagtugon sa panawagan ni Pangulong Ferdinand R. Marcos Jr. na palakasin ang mga hakbang para sa kapayapaan at kaayusan sa buong bansa, isinagawa ng Philippine National Police (PNP) ang isang pinaigting na plano ng pagpapatrolya at deployment sa buong Metro Manila simula Lunes ng umaga.

Ang hakbang na ito ay isinagawa ng National Capital Region Police Office (NCRPO) sa pamumuno ni Major General Anthony A. Aberin at inilunsad sa isang seremonya sa NCRPO Grandstand sa Camp Bagong Diwa, Bicutan, Taguig City.

Sa ilalim ng nasabing deployment strategy, 21,213 pulis mula sa kabuuang 23,305 na pwersa ng NCRPO ang inilatag upang tiyakin ang malawakang presensya ng pulisya at seguridad sa buong Metro Manila.

Layunin nitong mapanatili ang kaayusan, maiwasan ang krimen, at palakasin ang kaligtasan ng publiko. Ito ang isa sa pinakamalawak at pinakamalakas na operasyong ipinatutupad ng pulisya sa rehiyon sa kasalukuyan.

Bahagi ng bagong plano ang pagsasaayos ng puwersa: 13,473 ang nakatalaga sa beat patrols, habang 293 naman ang nakabantay sa mga lugar transportasyon gaya ng MRT/LRTs at mga bus terminals. Para sa mobile operations, 2,944 ang isinakay sa iba’t ibang uri ng sasakyan—1,993 sa mga motor vehicle, 931 sa mga motorsiklo, at 20 gamit ang bisikleta. May 629 pulis na naka-duty sa mga checkpoint, 344 sa mga border control points, at 1,794 sa mga fixed outposts. Dagdag pa rito, may 2,192 personnel ang naka-assign sa administrative patrol duties.

Ang bawat police district ay may mahalagang papel sa region-wide deployment na ito: Northern Police District (NPD) – 3,293; Eastern Police District (EPD) – 3,136; Manila Police District (MPD) – 4,049; Southern Police District (SPD) – 4,924; at Quezon City Police District (QCPD) – 4,308. Ang Regional Mobile Force Battalion (RMFB) ay nagpadala ng 819 personnel, habang 684 naman ang mula sa Regional Headquarters (RHQ) na sumusuporta sa operasyon.

Ipinaabot ni Philippine National Police chief, General Rommel Francisco D. Marbil ang kahalagahan ng inisyatiba sa isang mensahe.

” Ang recalibrated deployment plan ay ang aming tugon sa panawagan ni Pangulong Marcos na tiyakin ang kapayapaan, kaligtasan, at katatagan ng ating pambansang kabisera. Ipinapakita nito ang matibay naming dedikasyon na maghatid ng de-kalidad na serbisyo at bumuo ng ligtas na kapaligiran para sa bawat Pilipino,” ayon sa Hepe ng Pambansang Pulisya.

Muli ding pinagtitibay ng PNP ang pangako nitong isalin sa kongkretong aksyon ang marching order ng pamahalaan.

Ang pinaigting at mas pinagsanib na deployment plan na ito ay isang mahalagang hakbang tungo sa pangmatagalang kapayapaan at kaayusan hindi lamang sa Metro Manila kundi sa buong bansa—para sa mas ligtas na mga lansangan at mas matibay na tiwala ng publiko sa ating kapulisan, ayon kay PNP Public Information Office chief, Colonel Randulf T. Tuaño.