𝗕𝗜𝗡𝗜𝗚𝗬𝗔𝗡𝗚 𝗗𝗜𝗜𝗡 𝗻𝗶 𝗛𝗼𝘂𝘀𝗲 𝗗𝗲𝗽𝘂𝘁𝘆 𝗠𝗮𝗷𝗼𝗿𝗶𝘁𝘆 𝗟𝗲𝗮𝗱𝗲𝗿 𝗮𝘁 𝗜𝘀𝗮𝗯𝗲𝗹𝗮 𝟲𝘁𝗵 𝗗𝗶𝘀𝘁. 𝗖𝗼𝗻𝗴. 𝗙𝗮𝘂𝘀𝘁𝗶𝗻𝗼 “𝗜𝗻𝗻𝗼” 𝗔. 𝗗𝘆 𝗩 𝗻𝗮 𝗵𝗶𝗻𝗱𝗶 𝗻𝗮 𝗹𝗮𝗺𝗮𝗻𝗴 𝘀𝗶𝗺𝗽𝗹𝗲𝗻𝗴 𝗸𝗮𝗺𝗽𝗮𝗻𝘆𝗮 𝗻𝗴 𝗽𝗮𝗺𝗮𝗵𝗮𝗹𝗮𝗮𝗻 𝗮𝗻𝗴 𝗽𝗮𝗴𝗹𝗮𝗯𝗮𝗻 𝗻𝗶𝘁𝗼 𝘀𝗮 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢) 𝗸𝘂𝗻𝗱𝗶 𝗸𝗿𝘂𝘀𝗮𝗱𝗮 𝗻𝗮𝗿𝗶𝗻 𝗻𝗴 𝗯𝘂𝗼𝗻𝗴 𝗺𝗮𝗺𝗮𝗺𝗮𝘆𝗮𝗻𝗴 𝗣𝗶𝗹𝗶𝗽𝗶𝗻𝗼 𝗯𝗮𝘁𝗮𝘆 𝘀𝗮 𝗿𝗲𝘀𝘂𝗹𝘁𝗮 𝗻𝗴 𝘀𝘂𝗿𝘃𝗲𝘆 𝗸𝘂𝗻𝗴 𝘀𝗮𝗮𝗻 𝗺𝗮𝗿𝗮𝗺𝗶𝗻𝗴 𝗣𝗶𝗻𝗼𝘆 𝗮𝗻𝗴 𝘀𝘂𝗺𝘂𝘀𝘂𝗽𝗼𝗿𝘁𝗮 𝘀𝗮 𝗶𝗻𝗮𝗻𝘂𝗻𝘀𝗶𝘆𝗼𝗻𝗴 𝘁𝗼𝘁𝗮𝗹 𝗯𝗮𝗻 𝗻𝗶 𝗣𝗮𝗻𝗴𝘂𝗹𝗼𝗻𝗴 𝗕𝗼𝗻𝗴𝗯𝗼𝗻𝗴 𝗥. 𝗠𝗮𝗿𝗰𝗼𝘀, 𝗝𝗿. 𝗹𝗮𝗯𝗮𝗻 𝘀𝗮 𝗣𝗢𝗚𝗢.

Nabatid kay Dy, vice-chairperson ng House Committee on Tourism, na alinsunod sa inilabas na survey result ng OCTA Reasearch survey, makikita na mayorya ng mga Pilipino ang sumasang-ayon at sumusuporta sa total ban ng POGO na inanunsiyo ni Pangulong Marcos, Jr. sa kaniyang ikatlong State of the Nation Address (SONA).

Ayon kay Dy, ipinapakita ng naturang survey result na 83% ng mga Pilipino ang nagpahayag ng kanilang pangsang-ayon at suporta para sa paglulunsad ng isang “nationwide ban” o isang malawakang pagbabawal sa operasyon ng POGO sa iba’t-ibang bahagi ng bansa. Habang 12% lamang ang tumututol dito.

Sinabi din ng kongresista na ang Metro Manila, Luzon at sa labas ng Luzon ang may pinakamaraming respondents na pabor at sumusuporta sa total ban ng POGO. Ang National Capital Region (NCR) ang may pinakamataas na resulta matapos itong makakalap ng 20% survey result mula sa mga respondents.

Sabi ni Dy na maliwanag na ipinapakita ng resulta ng OCTA Research survey na hindi na lamang kampanya ng gobyerno ang total ban ng POGO kundi isang krusada ng buong mamamayang Pilipino laban sa naturang sugal na dinala ng mga Chinese nationals sa Pilipinas.

Pagdidiin pa ni Dy na maaaring napukaw na rin ang kamalayan ng mga Pilipino patungkol sa samu’t-saring kriminalidad o criminal activities na kinasasangkutan ng POGO kabilang na dito ang torture, pagpatay, prostitution at drug trafficking.

Paliwanag pa ng mambabatas, hindi na lamang ang gobyerno ang lumalaban sa POGO kundi katuwang narin nito ang buong mamamayang Pilipino sapagkat ang ipinaglalaban na aniya dito ay ang seguridad ng Pilipinas laban sa mga Chinese nationals na nagdala ng illegal na sugal sa bansa.