ANG desisyon ng Senate Impeachment Court na payagan ang House prosecution panel na makakuha ng bank at financial records ni Vice President Sara Z. Duterte ang maglalantad ng katotohanan ukol sa alegasyon ni dating Sen. Antonio “Sonny” Trillanes IV tungkol sa di-umano’y ugnayang pinansiyal ng drug lord na si Samuel Uy at ng pamilya Duterte.

Ito ang binigyang-diin ni House prosecution team spokesperson at dating Surigao del Norte Rep. Robert Ace S. Barbers na inaasahang mapapatunayan sa bank at financial records ni VP Sara ang mga ipinukol na alegasyon ni Trillanes ng ugnayan ng pamilya Duterte kay Sammy Uy matapos silang tumanggap umano ng malaking halaga ng pera dito.

Dati nang inilahad ni Trillanes ang umano’y kahina-hinalang transaksyong pinansyal sa pagitan ng pamilya Duterte at negosyanteng Chinese noong 2017 matapos payagan ng Senate Impeachment Court ang prosekusyon na makakuha ng mga bank records at iba pang financial records ni VP Sara.

Ayon kay Barbers, ang naging desisyon ng impeachment court ay nagbibigay lamang ng legal na proseso upang makuha ang mga financial records at hindi dapat ituring na patunay ng anumang paglabag sa batas.

“Anumang dokumentong makukuha ay sasailalim pa rin sa mga umiiral na patakaran sa ebidensya at masusing pagsusuri ng korte bago ito maaaring tanggapin bilang bahagi ng paglilitis,” ayon kay Barbers.

Inaasahang makatutulong ang naging desisyon ng impeachment court sa pagsisikap ng prosekusyon na makakuha ng mga dokumentaryong ebidensya na may kaugnayan sa Article II ng Articles of Impeachment, alinsunod sa umiiral na batas, mga alituntunin ng korte at mga karapatan ng lahat ng panig.

Magugunitang inihayag ni Trillanes na umano’y nag-isyu si Samuel Uy ng mga “manager’s check” pabor kina dating Pangulong Rodrigo Roa Duterte at iba pang miyembro ng kanyang pamilya noong 2017.

Sa mga naunang pagdinig ng House Committee on Justice, hindi isinapubliko ng Anti-Money Laundering Council (AMLC) ang mga bank statement at kumpletong account records na pinagbatayan ng kanilang pagsusuri.

Sa halip, kinumpirma lamang umano ng AMLC na may mga transaction reports na isinumite ng mga bangko sa ilalim ng Anti-Money Laundering Act at napatunayan ang ilang impormasyon kaugnay ng mga transaksyon.

Nagpatotoo rin si AMLC Executive Director Ronel Buenaventura na nakatanggap ang AMLC ng 630 Covered Transaction Reports (CTR) at 33 Suspicious Transaction Reports (STR) na may kaugnayan sa mga account nina Vice President Duterte at ng kanyang asawang si Manases “Mans” Carpio na sumasaklaw sa mga transaksyong umaabot sa humigit-kumulang ₱6.77 bilyon mula 2006 hanggang 2025.

Kinumpirma rin umano ng AMLC na may mga ulat ang mga bangko hinggil sa mga account na iniuugnay kina Duterte at Carpio, at napatunayan ang pagkakaroon ng ilang transaksyong naunang binanggit ni Trillanes.

Gayunman, hindi nito isinapubliko ang kumpletong bank records, kabilang ang eksaktong petsa at halaga ng lahat ng transaksyon, mga account number, kopya ng mga manager’s check o deposit slip, at kumpletong bank statements.

Nilinaw din ng AMLC na hindi nito pinatotohanan na sina Vice President Duterte o Carpio ay nagkasala ng money laundering o anumang iba pang krimen.

Ayon kay Barbers, ang mga financial records na hinihingi sa pamamagitan ng impeachment proceedings ay maaaring makatulong upang mapatunayan ang mga katotohanang itinuturing ng prosekusyon na mahalaga sa kaso.

Samantala, binigyang-diin din ng Senate Impeachment Court na ang pagpapalabas ng subpoena para sa mga financial records ay isang hakbang lamang sa pagkuha ng ebidensya at hindi dapat ipakahulugan bilang paghatol o pagtukoy ng pananagutan o pagkakasala.

Patuloy namang itinatanggi ni Vice President Sara Duterte ang mga alegasyon laban sa kanya at iginiit na ang impeachment proceedings ay may motibong pulitikal.

Sa ngayon, hindi pa ganap na nailalahad ng kampo ng depensa ang magiging epekto ng naturang desisyon, ngunit inaasahan itong kokontra sa anumang ebidensyang sa tingin nila ay hindi wastong nakuha o walang kaugnayan sa impeachment proceedings.