𝗡𝗔𝗡𝗜𝗡𝗜𝗪𝗔𝗟𝗔 𝘀𝗶 𝗞𝗮𝗯𝗮𝘁𝗮𝗮𝗻 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗥𝗮𝗼𝘂𝗹 𝗗𝗮𝗻𝗻𝗶𝗲𝗹 𝗔. 𝗠𝗮𝗻𝘂𝗲𝗹 𝗻𝗮 𝗺𝗮𝗮𝗮𝗿𝗶𝗻𝗴 𝗴𝗮𝗴𝗮𝗺𝗶𝘁𝗶𝗻 𝗹𝗮𝗺𝗮𝗻𝗴 𝗻𝗴 𝗽𝗮𝗺𝗶𝗹𝘆𝗮 𝗗𝘂𝘁𝗲𝗿𝘁𝗲 𝗮𝗻𝗴 𝗽𝘂𝘄𝗲𝘀𝘁𝗼 𝘀𝗮 𝗦𝗲𝗻𝗮𝗱𝗼 𝘂𝗽𝗮𝗻𝗴 𝗺𝗮𝗸𝗮𝘁𝗮𝗸𝗮𝘀 𝘀𝗮 𝗽𝗮𝗻𝗮𝗻𝗮𝗴𝘂𝘁𝗮𝗻 𝗽𝗮𝘁𝘂𝗻𝗴𝗸𝗼𝗹 𝘀𝗮 𝗺𝗮𝗱𝘂𝗴𝗼𝗻𝗴 “𝘄𝗮𝗿 𝗼𝗻 𝗱𝗿𝘂𝗴𝘀” 𝗮𝘁 𝗲𝘅𝘁𝗿𝗮-𝗷𝘂𝗱𝗶𝗰𝗶𝗮𝗹 𝗸𝗶𝗹𝗹𝗶𝗻𝗴𝘀 𝗻𝗮 𝗻𝗮𝗻𝗴𝘆𝗮𝗿𝗶 𝗻𝗼𝗼𝗻𝗴 𝗽𝗮𝗻𝗮𝗵𝗼𝗻 𝗻𝗴 𝘁𝗲𝗿𝗺𝗶𝗻𝗼 𝗻𝗶 𝗱𝗮𝘁𝗶𝗻𝗴 𝗣𝗮𝗻𝗴𝘂𝗹𝗼𝗻𝗴 𝗥𝗼𝗱𝗿𝗶𝗴𝗼 𝗥𝗼𝗮 𝗗𝘂𝘁𝗲𝗿𝘁𝗲.

Ito ang reaction ni Manuel matapos lumutang ang mga balitang balak ng isa sa mga anak ni dating Pangulong Duterte na kumandidatong senador sa darating na 2025 mid-term elections.

Pinaghahandaan na umano ng pamilya Duterte ang pagtakbo ni Davao City Mayor Baste Duterte bilang Pangulo sa 2028 Presidential elections.

Si Vice-President Inday Sara Duterte naman ay posibleng bumalik at kumandidatong mayor ng Davao City.

“Ang sigurado tayo sa ngayon ay kung mayroon man tatakbo na Duterte sa darating na 2025 mid-term elections ang layunin lamang nila ay gamitin ang Senado para magtago sa kanilang pananagutan kaugnay sa madugong war on drugs kung saan napakaraming inosenteng sibilyan ang napatay,” sabi ni Manuel.

“Hindi tayo sigurado kung totoo at final na ang binabanggit na political plans ng mga Duterte dahil ilang beses narin napatunayan na pinaglalaruan lamang nila ang political system ng bansa sa pamamagitan ng kanilang papalit-palit na candidacy announcement,” dagdag pa ni Manuel

Ayon kay Manuel, posibleng ginawa ni VP Inday Sara ang pagkalas sa Gabinete ni President Ferdinand “Bongbong” R. Marcos, Jr. upang makapaghanda ang kanilang pamilya sa pagiging “pekeng oposisyon” umano laban sa pamilya Marcos sa darating na 2025.

“Nagbitiw si VP Sara bilang DepEd Secretary at Cabinet member para lubos na makapaghanda ang pamilya Duterte sa pagiging pekeng oposisyon sa pamilya Marcos para sa halalan sa 2025,” ayon pa kay Manuel.