Cebu–Bukas at accessible sa mga turista ang Cebu, lalo na ang Cebu City, Lapu-Lapu at Mandaue, sa kabila ng lindol kamakailan, ayon kay Department of Tourism (DOT) Secretary Christina Garcia Frasco.

Idineklara ng ligtas para sa pampublikong kasiyahan, ayon sa pinuno ng turismo, ang mga pampublikong lugar, commercial zone, accommodation, at tourism sites na hindi apektado ng lindol sa Cebu.

Samantala, ang Mactan‑Cebu International Airport (MCIA) sa Lapu‑Lapu City at mga daungan, lalo na sa Cebu City, ay normal na ang mga aktibidad.

“Nais naming linawin na dito sa hilagang bahagi ng Cebu, patuloy ang relief efforts at maraming mga tourist sites ang nananatiling sarado.

Gayunpaman, ang ibang bahagi ng Cebu ay nananatiling bukas sa turismo,” ani Secretary Frasco.

Binanggit ng DOT na habang nasa state of calamity ang Cebu kasunod ng nagdaang lindol, maaaring bumisita ang mga turista, lalo na sa gitna at timog na bahagi ng isla.

Para sa mga naka-iskedyul na paglilibot, ang mga atraksyong bukas sa publiko ay kinabibilangan ng canyoneering sa Badian at island-hopping adventures sa Moalboal.

Bukas din sa mga bisita ang mga kultural at makasaysayang lugar tulad ng Basilica Minore del Santo Niño sa Cebu City at ang Lapu-Lapu Shrine sa Lapu-Lapu City.

Noong Sabado, binisita ng tourism chief ang Medellin at San Remigio. Nagbigay si Kalihim Frasco ng P3,000 donasyon sa 50 apektadong manggagawa sa turismo.