NAGHAHANDA na si Senador Nancy Binay para sa pagtakbo sa pagka-mayor ng Makati City, base sa kanyang pinakabagong post sa social media.

Nag-post si Binay sa Facebook at Twitter ng Linggo, Setyembre 8, ng mensaheng “Ready to serve…” kasama ang hashtag na #Makati2025.

Ang post ay may kasamang larawan niya na may hawak na heart-shaped sign na may nakasulat na “100%” na nagpapakita ng kanyang buong kahandaang pagsabak sa lokal na politika.

Matagal nang usap-usapan ang kanyang pagtakbo bilang mayor sa Makati.

Sa isang panayam noong Agosto, sinabi ni Binay na malamang na tatakbo siya bilang mayor ng Makati, mula sa dati niyang pahayag na nasa 70 porsiyento pa lamang ang kanyang desisyon.

Gayunpaman, tila ang lumalaking suporta mula sa mga taga-Makati nitong Agosto ang siyang nagpatibay ng kanyang desisyon para tumakbo sa lungsod.

Ang pagtakbo ni Nancy ay may buong suporta ng kanyang pamilya, kasama ang kanyang ama na si dating Bise Presidente Jejomar Binay, na nagsilbi rin bilang mayor ng Makati sa loob ng ilang dekada. Sa pagtatapos ng kanyang termino bilang senador sa 2025, marami ang nakikita ang kanyang susunod na hakbang sa politika bilang pagpapatuloy ng tatak ng serbisyo ng mga Binay sa Makati.

Ang darating na 2025 mayoral race sa Makati ay inaasahang magiging kapanapanabik, habang pinuposisyon ni Binay ang sarili bilang isang malakas at matibay na contender.