NATIMBOG matapos magtago ng mahigit 12 taon ang lalaking akusado ng panghahalay sa Baguio City noong Huwebes sa Taguig City.

Nagtago sa iba’t-ibang lugar si alyas Allan, 51, bago nasukol ng mga tauhan ni Southern Police District (SPD) director P/Col. Glenn Oliver Cinco pasado alas-11:00 ng umaga sa Punay St., Brgy. Rizal, Taguig City.

Ayon kay SPD District Special Operations Unit (DSOU) chief P/Lt. Col. Antonio Ananayo Jr., inaresto ang suspek sa bisa ng warrant of arrest mula kay Baguio City Regional Trial Court (RTC) Presiding Judge Emmanuel Cacho Rasing.

Nakadetine sa custodial facility ng DSOU-SPD ang akusado habang hinihintay ang utos ng korte upang ilipat siya sa Baguio City jail.