GAPAN CITY–Timbog sa buy-bust ang isang negosyante dahil sa P360,400 na halaga ng shabu kasama ang dalawa pang kasabwat noong Martes sa Brgy. Malimba ng lungsod na ito.

Ikinasa ang buy-bust dakong alas-11:15 ng umaga kung saan nakabili ng shabu ang mga pulis kay alyas Nani, 46, at dalawa niyang kasabwat, at humantong sa pagkaaresto nila.

Sa ulat na isinumite kay Nueva Ecija police chief Col. Ferdinand Germino, nakilala ang dalawa pang kasama ng suspek na sina alyas Ton, 32, delivery worker, at alyas Jef, lending collector.

Tinatayang nasa 53 gramo ng shabu ang nakumpiskang sa mga suspek na may street value na P360,400.

Dinala sa himpilan ng pulisya ang tatlong suspek at ang mga nakuhang ebidensya sa droga para sa kaukulang disposisyon.

Inihahanda na ang mga kasong paglabag sa Republic Act 9165 o Comprehensive Dangerous Drugs Act of 2002 para sa inquest-filing laban sa mga suspek sa tanggapan ng piskal ng lungsod.

“Ang operasyong ito nagbibigay-diin sa ating patuloy na pagsisikap na puksain ang mga iligal na droga at pangalagaan ang buhay ng ating mga kapwa Novo Ecijano.

Nananatili kaming matatag sa aming misyon na sugpuin ang mga network ng droga at dalhin ang mga may kasalanan sa hustisya,” sabi ni Col. Germino.