STA. TERESITA, BATANGAS–Namatay matapos matabunan ng gumuhong lupa noong Sabado sa Brgy. Calumala ng bayang ito ang 69-anyos na construction worker, ayon sa report ng pulisya.

Sa imbestigasyon, nagpapahinga ang nasawing si alyas Teodoro sa kanilang barracks kasama ang mga katrabaho sa gitna ng malakas na ulan ng biglang gumuho ang lupa bandang alas-11:00 ng gabi.

Sa pagtatangkang tumakas, nahulog ang biktima sa apat na metrong riprap at natabunan ng mga debris.

Nahukay siya ng mga kasamahan pero naantala ang paghahatid sa kanya sa ospital dahil sa mataas na baha.

Ayon kay Dr. Reginald Mercado, bandang ala-1:25 ng madaling-araw noong Linggo binawian ng buhay si Teodoro sa Taal Polymedic Hospital.