𝗕𝗔𝗚𝗔𝗠𝗔’𝗧 𝗻𝗮𝗸𝗮-𝗯𝗿𝗲𝗮𝗸 𝗮𝗻𝗴 𝘀𝗲𝘀𝘀𝗶𝗼𝗻 𝗻𝗴 𝗞𝗮𝗺𝗮𝗿𝗮 𝗱𝗲 𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀, 𝘁𝘂𝗹𝗼𝘆 𝗮𝗻𝗴 𝗽𝗮𝗴𝗹𝗶𝗹𝗶𝗻𝗴𝗸𝗼𝗱 𝗻𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝗺𝗮𝘁𝗮𝗽𝗼𝘀 𝘀𝗶𝘆𝗮𝗻𝗴 𝗺𝗮𝗺𝗮𝗵𝗮𝗴𝗶 𝗻𝗴 𝗰𝗮𝘀𝗵 𝗮𝘀𝘀𝗶𝘀𝘁𝗮𝗻𝗰𝗲 𝗽𝗮𝗿𝗮 𝘀𝗮 𝗽𝗮𝗺𝗶𝗹𝘆𝗮 𝗻𝗴 𝗺𝗴𝗮 𝗢𝘃𝗲𝗿𝘀𝗲𝗮𝘀 𝗙𝗶𝗹𝗶𝗽𝗶𝗻𝗼 𝗪𝗼𝗿𝗸𝗲𝗿𝘀 (𝗢𝗙𝗪𝘀) 𝗺𝘂𝗹𝗮 𝘀𝗮 𝗶𝗯𝗮’𝘁-𝗶𝗯𝗮𝗻𝗴 𝗯𝗮𝘆𝗮𝗻 𝘀𝗮 𝗩𝗶𝗰𝘁𝗼𝗿𝗶𝗮, 𝗢𝗿𝗶𝗲𝗻𝘁𝗮𝗹 𝗠𝗶𝗻𝗱𝗼𝗿𝗼.

Sinabi ni Magsino na sinasamantala nito ang pagkakataon habang naka-break ang session ng Kongreso para matulungan ang naiwang pamilya ng mga OFWs habang sila naman ay kumakayod at nagbabanat ng buto o nagta-trabaho sa iba’t-ibang panig ng mundo.

Ayon kay Magsino, nililibot nila ang iba’t-ibang lalawigan sa bansa para maghatid ng serbisyo at tulong para sa pamilya ng mga OFWs kaagapay ang Department of Social Welfare and Development (DSWD).

Sabi ni Magsino na maraming OFWs ang labis na nagpapasalamat dahil sa ipinagkakaloob nilang tulong. Isa itong malaking kaginhawahan para sa kanila sapagkat napapanatag aniya ang kalooban ng mga OFWs na bagama’t sila’y nasa ibang bansa ay nakakaasa naman sila na may umaalalay sa naiwan nilang pamilya sa Pilipinas.

“Maraming OFWs ang nakaka-appreciate ng ating mga ginagawang pagtulong sa kanilang pamilya dito sa Pilipinas. Iyan naman talaga ang advocasy ng OFW Party List ang makatulong, hindi lamang para sa mga OFWs kundi pati narin sa kanilang pamilya,” wika ni Magsino.

Idinagdag pa ng kongresista na 567 benepisyaryo o OFW families sa nasabing lalawigan ang kanilang natulungan at inaasahan na marami pang pamilya ng mga OFWs ang napagkakalooban nila ng tulong.

Kaugnay sa naging pagdiriwang ng ika-126 anibersaryo ng Kalayaan ng Pilipinas noong June 12, sinabi ni Magsino na dapat ipagpatuloy ang pagmamatyag sa kalayaan ng bansa.

“Tayo’y nagbibigay pugay sa ating mga ninuno na nagbuwis ng buhay para sa ating kasarinlan. Maging sa mga bayani ng ating makabagong panahon. Ipagpatuloy natin ang pagmamatyag para sa kalayaan ng ating bansa,” sabi pa ni Magsino.