CAMP OLIVAS–Isang suspek sa pagbebenta ng ilegal na droga ang naaresto at nakumpiska sa kanya ang tinatayang P1.63 milyong shabu sa Balanga City, Bataan noong Martes.

Inaresto ng mga tauhan ng Station Drug Enforcement Unit (SDEU) ng Balanga City police ang suspek sa Roman super highway sa Brgy. Tuyo at nasamsam ng mga awtoridad ang 240 gramo ng hinihinalang shabu, isang cellphone at ang buy-bust money.

Pinuri ni Brig. Gen. Rogelio Peñones, hepe ng Central Luzon police, ang kanyang mga tauhan sa pag-aresto sa suspek.

“Ang tagumpay na ito ay malinaw na mensahe na nananatiling walang humpay ang PRO3 sa pagtugis sa mga sumisira ng buhay at komunidad,” sabi ng heneral.