CABANATUAN CITY–Timbog ang 30-anyos na welder matapos mahulihan ng shabu na nagkakahalaga ng P347,820 sa buy-bust noong Sabado ng hapon.

Ayon kay city police chief Lt. Col. Renato Morales, naaresto ang suspek na si alyas PJ na may pag-iingat na 51.15 na gramo ng shabu sa kanyang bahay bandang alas-2:30 ng hapon.

Dinakip ang suspek matapos maiabot sa kanya ng police poseur-buyer ang P1,000 kapalit ng isang plastic sachet ng shabu.

Inihahanda na ang kasong paglabag sa Republic Act 9165 (Comprehensive Dangerous Drugs Act of 2002) para sa inquest-filing laban sa suspek sa tanggapan ng piskalya sa lungsod na ito.