DALAWANG hinihinalang tulak noong Martes ang nasakote at nakuhanan ng P680,000 na halaga ng shabu sa police operation sa Block 2, Lot 4, Gravel Pit, Brgy. Guinayang, San Mateo, Rizal.

Nahulihan ang mga suspek na sina alyas Jun at Lyn ng 100 gramo ng shabu na nasa halagang P680,000; anim na sachets na naglalaman ng pinaghihinalaang shabu na may bigat na 3.15 gramo at may value na P21,420, isang 9mm pistol, Caspian arms LTD, mga bala, magasin, belt bag, buy-bust money at iba pang drug paraphernalia.

Isinagawa bandang alas-2:58 ng madaling araw ang operation ng Drug Enforcement Team ng San Mateo police Station.

Ang mga suspek nakakulong sa custodial facility ng San Mateo police habang inihahanda ang mga kaukulang dokumento para sa pagsasampa ng kaso laban sa kanila, ayon kay Rizal police director P/Col. Felipe Maraggun.