PINAG-AARALAN ni Senator Robinhood “Robin” Padilla ang posibleng paghahain ng ethics complaint laban kay Senator Francis “Kiko” Pangilinan matapos ang mainit na palitan ng dalawa sa plenaryo ng Senado nitong Martes.

Batay sa inisyal na impormasyon mula sa Senado, inireklamo ni Padilla na umano’y sinigawan siya ni Pangilinan habang nagpapatuloy ang sesyon, dahilan para pansamantalang masuspinde ang pagdinig.

Nangyari ang insidente habang patuloy na tinatalakay ng mga senador ang mga usaping may kaugnayan kay Senator Ronald “Bato” dela Rosa, na lumutang sa Senado sa gitna ng mga ulat kaugnay ng arrest warrant na inilabas ng International Criminal Court.

Tinalakay sa sesyon kung paano dapat tumugon ang Senado sa posibleng pag-aresto sa isa sa mga miyembro nito, partikular sa mga tanong kaugnay ng institutional rules, legal processes at awtoridad ng law enforcement.

Nagpahayag si Padilla ng pangamba sa paraan ng posibleng pag-aresto sa isang senador, at iginiit na dapat dumaan ang anumang aksyon sa malinaw at legal na proseso.

Si Pangilinan, na isang abogado, ay naglatag naman ng mga punto kaugnay ng due process at rule of law sa mga isyung may kinalaman sa warrants, jurisdiction at accountability.

Nagdagdag ang palitan ng dalawa sa tensyon sa Senado, kung saan iniulat na hinigpitan ang seguridad habang binabantayan ng mga mambabatas at kawani ang mga development kaugnay kay Dela Rosa.