MAY opsyon si Vice President Sara Duterte kung dadalo o hindi sa impeachment hearings sa Kamara de Representantes, dahil ang kanyang presensiya ay bahagi ng kanyang karapatan sa due process, ayon kay House Committee on Justice Chair Gerville “Jinky Bitrics” Luistro ng Batangas.

Ayon kay Luistro, iimbitahan ang Bise Presidente kapag umabot na ang proseso sa pormal na pagdinig, ngunit nasa kanya pa rin ang pasya kung sisipot.

“Let us understand na ’yung presence during the hearing proper is part of her due process. In other words, the prerogative belongs to her. Whether she wants to come or not to come, that is actually her option,” ani Luistro sa isang radio interview noong Huwebes.

Ipinaliwanag niya na ang mga pagdinig ay pagkakataon para maiharap ng mga nagrereklamo ang kanilang mga testigo at ebidensiya sa harap ng komite bilang bahagi ng proseso ng impeachment.

Binigyang-diin niya na ang botohan sa komite ang magtatakda kung uusad pa ang mga reklamong impeachment batay sa probable cause.

“Dito sa step five iba, majority of all members, regardless of the present and the absent members,” ani Luistro.

Binubuo ang panel ng 55 miyembro, kabilang ang ex-officio members, kaya kailangan ng hindi bababa sa 28 boto para makuha ang kinakailangang mayorya.

Noong Miyerkules, bumoto ang komite ng 54–1, at walang abstention, sa separadong botohan na sapat sa substansiya ang ikatlo at ikaapat na reklamong impeachment.

Sa simula ng proseso, simple majority lamang ang kailangan basta’t may quorum, ngunit tumataas ang threshold kapag sinusuri na kung may sapat na batayan para ituloy ang impeachment.

Paliwanag ni Luistro, mas mataas ang voting requirement dahil mabigat ang magiging pasya ng komite bago dalhin ang kaso sa plenaryo.

Sinabi ni Luistro na tiningnan ng mga miyembro ng komite ang Statements of Assets, Liabilities and Net Worth (SALNs) ni Duterte sa pag-aaral ng mga alegasyon na nasa impeachment complaint, na kung tugma ang kanyang deklarasyon sa kanyang iniulat na kita.

May ilang mambabatas na nagsabing tila may hindi pagkakatugma sa pagitan ng financial disclosures at sa kita na iniuugnay sa Bise Presidente sa panahong saklaw ng reklamo.

“I cannot speak for myself, but according to the majority of the Justice members, yes, bank records are relevant because the statement of facts or the recital of facts provided the income of the respondent and the improbability of having rose the amount maintained in the bank out of the income which is being generated,” saad ni Luistro.

Nabanggit ito sa deliberasyon nang iharap ng isang miyembro ng panel ang SALN ng Bise Presidente bilang bahagi ng kanyang manifestation.

“And you will remember, Congressman Terry Ridon, in giving his manifestation, shared the two SALN already and apparently, these SALN are not proportionate, should I say, or consistent to the amount which was being generated by the respondent during the relevant time,” aniya.

Ayon kay Luistro, kabilang ang paghahambing sa declared assets at income sa mga puntong binibigyang-pansin ng ilang miyembro sa pagbusisi sa mga paratang.

“That’s why, according to the majority, and it has been ruled upon, pinagbotohan ’yan at ito ’yung argument at least of a huge number of members of the Justice Committee, relevant documents and bank records,” dagdag niya.