SINUPORTAHAN 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗮𝗻𝗴 𝗽𝗮𝗴𝗸𝗶𝗹𝗼𝘀 𝗻𝗴 𝗽𝗮𝗺𝘂𝗻𝘂𝗮𝗻 𝗻𝗴 𝗠𝘂𝗹𝘁𝗶𝗻𝗮𝘁𝗶𝗼𝗻𝗮𝗹 𝗩𝗶𝗹𝗹𝗮𝗴𝗲 𝘀𝗮 𝗣𝗮𝗿𝗮𝗻𝗮𝗾𝘂𝗲 𝗖𝗶𝘁𝘆 𝗹𝗮𝗯𝗮𝗻 𝘀𝗮 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢) 𝘀𝗮 𝗸𝗮𝗻𝗶𝗹𝗮𝗻𝗴 𝗹𝘂𝗴𝗮𝗿.

Ayon kay Valeriano, chairperson ng House Committee on Metro Manila Development, hindi na niya kailangan pang maging residente ng Parañaque City para lamang maiparamdam nito ang kaniyang suporta sa naging hakbang ng Homeowners Association sa Multinational Village.

Ito ay matapos na tiyakin ng nanalong Pangulo ng nasabing grupo na si Ginoong Arnel Gacutan na determinado siyang walisin ang POGO sa kanilang lugar.

Pinapurihan ni Valeriano ang pahayag ni Gacutan sapagkat ang paglaban aniya sa illegal POGO ay kinakailangan ng “whole system approach” sa pamamagitan ng partisipasyon ng bawat mamamayan kabilang na ang mga nasa “grassroot level” gaya ng grupo ni Gacutan at mga kauri nito.

Paliwanag ng kongresista, hindi kakayanin ng pamahalaan ang pagpuksa sa POGO kung nag-iisa lamang ito sa pagsasagawa ng kampanya laban sa nasabing illegal na sugal, dahil kinakailangan ang suporta ng buong mamamayang Pilipino.

Pagdidiin ni Valeriano, nakapahalaga ng nagkakaisang suporta at boses ng buong mamamayan laban sa illegal na operasyon ng POGO dahil ang POGO ay hindi lamang problema ng gobyerno kundi ng mga Pilipino mismo sa kabuuan.

“Kailangan na nating tuminding bilang mga Pilipino laban sa POGO. Ito’y hindi lamang problema ng ating pamahalaan, kundi ng buong Pilipinas. Kaya kailangan talaga ang tulong mula sa mga mamamayan,” sabi ni Valeriano.