PINAPURIHAN at malugod na sinalubong ni Senador JV Ejercito ang hakbangin ni Pangulong Ferdinand Marcos Jr. na pansamantalang itigil ang rehabilitasyon ng EDSA, sabay panawagan na unahin muna ang pagtatapos ng mga pangunahing proyektong pang-riles sa Metro Manila upang matugunan ang lumalalang krisis sa trapiko.

“Glad that the President already issued an order suspending the EDSA rehab!” ani Ejercito sa kanyang opisyal na pahayag.

Ipinaliwanag ng senador na kailangang isagawa muna ang masusing pagsusuri sa magiging epekto ng proyekto sa ekonomiya bago ito ituloy. Aniya, ang hindi pinaghandaan at agarang pagsisimula ng mga pagkukumpuni sa kalsada ay maaaring makasama kaysa makabuti sa daloy ng trapiko sa lungsod.

Tinukoy ni Ejercito ang datos ng Japan International Cooperation Agency (JICA), kung saan lumalabas na umaabot na sa mahigit ₱3.5 bilyon kada araw ang lugi ng bansa dahil sa matinding trapiko sa Metro Manila. Babala pa niya, posibleng lumobo ito sa ₱5.4 bilyon bawat araw pagsapit ng 2035 kung walang mabisang solusyong maipatupad.

Binigyang-diin niya na dapat munang ituon ng pamahalaan ang buong atensyon sa pagpapagana ng North-South Commuter Railway at Metro Manila Subway System bago simulan ang malawakang pagsasaayos ng EDSA.

“These systems will offer reliable alternatives to private vehicles, helping minimize disruption to the public during any road reconstruction,” paliwanag niya.

Dagdag pa ni Ejercito, maging ang mga ahensiyang mangangasiwa sa proyekto ay umaaming posibleng lalala ang trapiko habang isinasagawa ang mga gawaing kalsada.

Bagama’t bukas umano ang EDSA bus lane sa panahon ng rehabilitasyon, iginiit ni Ejercito na hindi ito sapat upang ma-accommodate ang mga commuter na araw-araw umaasa sa jeep, shuttle, at carpool. “Side roads will become more crowded, making daily commutes longer and more difficult,” aniya.

“This project risks pushing our traffic situation to the brink,” babala ni Ejercito, at sa matinding paninindigan ay binigyang-diin sa wikang Filipino: “Ang kailangan natin ngayon ay ilatag ang mga riles, hindi muna ang pag-aayos ng mga kalsada.”

Sa huli, muling binigyang-linaw ng senador ang kanyang matagal nang adbokasiya sa modernong sistemang pang-riles bilang susi sa pagresolba sa urban congestion:

“My position ever since is fast track all railway projects! Railway is the only way!”