TINIYAK ng Bureau of Immigration (BI) ang suporta sa pagbangon ng turismo alinsunod sa direktiba ni Pangulong Ferdinand R. Marcos Jr. na palakasin ang ekonomiya ng Pilipinas.

Ayon sa datos ng BI, nakapagtala ang Pilipinas ng kabuuang 14,733,597 international arrivals noong 2024, isang pagbangon na halos kasing taas ng pre-pandemic level na 17,085,097 noong 2019.

Sinabi ni BI Commissioner Joel Anthony Viado na nagpapakita ang datos ng tuloy-tuloy na pagbangon ng sektor ng turismo.

Ang South Korea ay nanatiling nangungunang pinagmumulan ng mga dayuhang turista, na may 1,761,281 bisita, sinundan ng Estados Unidos, 1,325,684; at Tsina, 500,082.

Binigyang-diin ni Viado ang papel ng Bureau sa pagpapadali ng paglago ng turismo sa pamamagitan ng pinahusay na mga proseso ng imigrasyon.

“Ang BI nananatiling nakatuon sa pagpapadali at modernisasyon ng ating mga pamamaraan ng pagpasok upang suportahan ang momentum na ito habang pinapanatili ang seguridad sa hangganan,” dagdag pa niya.

Dagdag pa rito, ipinakita ng India at Singapore ang makabuluhang potensyal para sa karagdagang paglago.

“Buong suporta ang ibinibigay ng BI sa mga inisyatibo ng gobyerno upang palakasin ang industriya ng turismo,” dagdag pa ni Viado.

Sinabi ni Viado na iniimbitahan nila ang mga banyagang turista na magtagal sa Pilipinas at tamasahin ang iba’t-ibang tanawin at tunog ng bansa sa pamamagitan ng paggawa ng mga serbisyo ng imigrasyon na madali at abot-kaya.

Sinabi niyang ang mga visa extension at iba pang serbisyo madaling makukuha sa mahigit 60 mga tanggapan sa buong bansa, o online sa eservices.immigration.gov.ph.