NAGHAHANDA ang Senado sa posibilidad na magsabay ang impeachment trial ni Vice President Sara Duterte, budget season at regular legislative work, habang inaayos ng mga opisyal ang room assignments, crowd control, media access at gastos para sa paglilitis na maaaring umabot sa 92 trial days.

Sinabi ni Senate Secretary at Impeachment Clerk of Court Renato Bantug Jr., sa panayam sa DWIZ, na kailangang magpatuloy ang committee hearings at iba pang legislative functions ng Senado kahit isinasagawa ang impeachment trial.

Sinabi niya na magiging mas mabigat ang trabaho kung sasabay ang trial sa budget deliberations, na karaniwang dinadaluhan ng maraming opisyal at support staff mula sa iba’t ibang ahensya ng gobyerno.

Ayon kay Bantug, maaaring umabot sa 92 trial days ang paglilitis batay sa inaasahang presentasyon ng ebidensya ng prosecution at defense. ]

“Opo. Kung aabot talaga tayo ng 92 trial days, yan ang magiging pinakamahaba nating impeachment trial so far,” ani Bantug.

Sinabi niya na naglaan ang Senado ng ilang committee rooms para sa legislative work at hindi lahat ng available rooms ay ilalaan sa impeachment-related functions.

Aniya, kailangan ito dahil kailangang magpatuloy ang budget hearings at committee work kahit may impeachment trial.

Sinabi ni Bantug na maaaring kailanganing kontrolin ng Senado ang bilang ng mga taong papasok sa gusali kung magsasabay ang impeachment proceedings, committee hearings at budget deliberations.

Ayon kay Bantug, isa sa mga opsyong maaaring ikonsidera ay ang pagpapahintulot sa ilang agency support staff na makilahok online, gaya ng naging sistema noong pandemya, habang nililimitahan ang bilang ng mga taong pisikal na nasa Senado.

Sinabi niya na malaking hamon ang crowd management dahil sa budget hearings pa lamang ay napupuno na ang Senado ng resource persons mula sa iba’t ibang ahensya.

Sinabi rin ni Bantug na aprubado na ni Senate President Sherwin Gatchalian ang room assignments para sa impeachment trial, habang pag-uusapan pa ang media arrangements.

Ayon sa kanya, inaasahan ng Senado ang malaking interes sa coverage ng trial, ngunit kailangang isaalang-alang ang limitadong espasyo sa Senate building.

Nire-revise na rin ng Senado ang tentative budget estimates para sa impeachment trial. Sinabi ni Bantug na ang naunang estimates ay batay sa 60 trial days, ngunit humiling siya ng updated figures batay sa posibleng 100 trial days.

Sinabi niya na hindi pa naipiprisinta kay Gatchalian ang revised figures at rerepasuhin pa kung aling gastos ang dagdag at alin ang bahagi ng regular operations ng Senado.

Sinabi ni Bantug na pinaplano pa ang magiging daloy ng unang araw ng trial sa July 6.

Ayon sa kanya, kailangan ng walkthrough para kay Gatchalian, na inaasahang mamumuno sa impeachment court, at sa court staff bago magsimula ang trial.

Inaasahang pamamahalaan ng Senado ang impeachment court habang ipinagpapatuloy ang budget hearings, committee work at iba pang legislative functions sa mga susunod na buwan.