𝗜𝗡𝗜𝗛𝗔𝗬𝗔𝗚 𝗻𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝗻𝗮 𝗮𝗻𝗴 𝗽𝗶𝗿𝗺𝗮 𝗻𝗮 𝗹𝗮𝗺𝗮𝗻𝗴 𝗻𝗶 𝗣𝗿𝗲𝘀𝗶𝗱𝗲𝗻𝘁 𝗙𝗲𝗿𝗱𝗶𝗻𝗮𝗻𝗱 “𝗕𝗼𝗻𝗴𝗯𝗼𝗻𝗴” 𝗥. 𝗠𝗮𝗿𝗰𝗼𝘀, 𝗝𝗿. 𝗮𝗻𝗴 𝗵𝗶𝗻𝗶𝗵𝗶𝗻𝘁𝗮𝘆 𝗽𝗮𝗿𝗮 𝘁𝘂𝗹𝘂𝘆𝗮𝗻 𝗻𝗴 𝗺𝗮𝗶𝘀𝗮𝗯𝗮𝘁𝗮𝘀 𝗮𝗻𝗴 “𝗽𝗲𝘁 𝗹𝗲𝗴𝗶𝘀𝗹𝗮𝘁𝗶𝗼𝗻” 𝗻𝗶𝘁𝗼 𝗻𝗮 𝗠𝗮𝗴𝗻𝗮 𝗖𝗮𝗿𝘁𝗮 𝗳𝗼𝗿 𝗦𝗲𝗮𝗳𝗮𝗿𝗲𝗿𝘀 𝗻𝗮 𝗻𝗮𝗴𝗹𝗮𝗹𝗮𝘆𝗼𝗻𝗴 𝗺a𝗯𝗶𝗴𝘆𝗮𝗻 𝗻𝗴 𝗸𝗮𝘂𝗸𝘂𝗹𝗮𝗻𝗴 𝗽𝗿𝗼𝘁𝗲𝗸𝘀𝗶𝘆𝗼𝗻 𝗮𝗻𝗴 𝗺𝗴𝗮 𝗣𝗶𝗻𝗼𝘆 𝘁𝗿𝗶𝗽𝘂𝗹𝗮𝗻𝘁𝗲.

Ayon kay Magsino, naghihintay na lamang sila ng lagda ng Pangulong Marcos, Jr. upang tuluyang maisakatuparan ang isinulong nitong adhikain na mangangalaga sa interes at kapakanan ng mga Pilipinong Seafarers.

Ang naging pahayag ni Magsino ay kaugnay sa dinaluhan nitong ikatlong anibersaryo ng Nueva Viscaya Overseas Filipino Workers (OFW) Association Inc. na ginanap sa Bayombong, Nueva Viscaya kung saan ang tema ng nasabing pagdiriwang ay ang pagbibigay importansiya sa kahalagahan ng mga OFWs kasama na ang kanilang mga pamilya.

Binigyang diin ng kongresista na patuloy ang kaniyang pagsisikap na magsulong o maghain ng mga makabuluhang panukalang batas na hindi lamang magbibigay proteksiyon para sa mga OFWs kundi pati narin sa mga Pinoy Seafarers.

“Ang pirma na lamang ng ating Pangulong Marcos, Jr. ang ating hinihintay bago tuluyang maisakatuparan ang adhikain nating ito. Matagal po natin hinintay ang pagkakataong ito, hindi na po magtatagal at maisasabatas din ang Magna Carta for Seafarers,” sabi ni Magsino.

Ipinabatid din ni Magsino na ang Pilipinas ang nangungunang bansa sa buong mundo na supplier o pinagkukuhanan ng mga Pilipinong tripulante kung saan 600,000 Pilipino ang nagta-trabaho sa Maritime Industry.

“The Philippines is the world’s leading supplier of seafarers with over 600,000 Filipinos working in the Maritime Industry,” dagdag pa ni Magsino.