PINUNA ni House Committee on Justice Vice Chair Ysabel Maria Zamora ng San Juan ang alkalde ng Zamboanga City na si Khymer Olaso dahil sa kanyang mga pahayag na tumutuligsa sa proseso ng impeachment, na obligasyon ng mga mambabatas na isagawa ayon sa Konstitusyon.

Si Zamora, isang abogado mula sa University of the Philippines (UP), ay naglabas ng pahayag matapos mag-post si Olaso ng video sa Facebook kung saan tinawag niyang “kalokohan” o walang saysay ang impeachment.

“Sa lahat ng paggalang sa aking dating kasamahan, sa tingin ko ay hindi kinakailangan ang mga salitang gaya ng ‘kalokohan’ at ‘bugok lang ang gumagawa’ sa anumang matalinong talakayan,” ani Zamora.

Binigyang-diin ni Zamora na ang impeachment ay hindi isang opsyong politikal kundi isang obligasyong konstitusyonal na dapat isulong kapag may naisampang reklamo.

“Ang House of Representatives, o ang Committee on Justice nito, ay hindi maaaring umiwas sa tungkuling itinakda ng Konstitusyon na dinggin ang mga reklamong impeachment,” ani Zamora.

Dagdag pa niya: “May nagsampa ng mga reklamo kaya kailangang ipagpatuloy ang proseso. Magkukulang kami sa aming tungkulin bilang mga opisyal ng gobyerno kung hindi namin gagawin ang iniuutos sa amin ng Konstitusyon.”

Kasalukuyang tinutukoy ng House Justice panel kung may probable cause sa mga reklamong impeachment laban kay Bise Presidente Sara Z. Duterte matapos itong mapagpasyahang sapat sa porma, nilalaman, at mga batayan—isang mahalagang hakbang bago maisulong ang proseso.

Pinahintulutan ng plenaryo ang komite na ipagpatuloy ang mga pagdinig kahit sa panahon ng congressional recess mula Marso 21 hanggang Mayo 3.

Tinanggihan ni Zamora ang malawakang pahayag ni Olaso na hindi ginagawa ng mga mambabatas ang kanilang trabaho, at tinawag itong hindi makatarungan.

“Hindi makatarungan na ipahiwatig na walang gumagawa ng kanilang tungkulin o hindi nagtatrabaho. Muli, bahagi ito ng aming trabaho bilang mga kongresista. Dapat alam iyon ni Mayor Olaso dahil naging kongresista rin siya,” aniya.

Itinuro rin niya na patuloy ang Kamara sa paggawa ng mga batas at pagpapatupad ng mga hakbang na naglalayong mapagaan ang pasanin ng mga Pilipino kahit isinasagawa ang impeachment proceedings.

“Bukod pa rito, hindi tama na sabihing hindi ginagampanan ng House of Representatives ang tungkulin nito, dahil patuloy kaming nagsasagawa ng mga pagdinig ukol sa mga panukalang batas at nagpapatibay ng mga batas na mahalaga upang mapabuti ang buhay ng mga Pilipino,” ani Zamora.

“Ang paggawa ng batas ang pangunahing tungkulin ng mga kongresista at kung susuriing mabuti, ginagawa naman namin ito,” dagdag pa niya.