ISANG mag-anak ang pinagnakawan at iginapos ng mga nagpakilalang armadong miyembro ng Philippine Drugs Enforcement Agency (PDEA) noong Nobyembre 7 sa San Bartolome St., Phase 2, Brgy. Pacita 1, San Pedro City, Laguna.

Tinangay ng mga nagpakilalang PDEA members ang hindi mabatid na halaga ng salapi at iba’t-ibang gamit ng mga biktima na hindi muna pinangalanan ng mga pulis.

Sa ulat ng Tactical Operation Center ng San Pedro police, pinasok ang bahay ng mag-anak dakong alas-3:39 ng madaling araw.

Hinalughog ng mga salarin ang gamit ng pamilya at saka sabay-sabay na iginapos.

Sinabi ng mga suspek na magse-serve sila ng warrant of arrest sa mga biktima subalit ng makapasok na, mabilis na iginapos sa loob ng kuwarto bago hinalughog ang mahahalagang gamit gayundin ang hindi batid na halaga ng salapi.