NASAKOTE ng mga elemento ng Northern Police District (NPD) ang dalawang suspek sa krimen noong Miyerkules sa Maynila at Valenzuela.

Unang nadakip ng mga tauhan ni Valenzuela police chief P/Col. Nixon Cayaban dakong alas-9:00 ng gabi si alyas Adan, 25, sa Glenrose Subdivision, Brgy. Bignay dahil sa kasong robbery.

Sangkot umano sa panghoholdap, pagnanakaw at iba pang krimen sa Valenzuela City at karatig lungsod si alyas Adan.

Dakong alas-11:00 ng gabi natiklo sa casino sa Pedro Gil St., Malate, Manila ng mga tauhan ni NPD District Director P/BGen. Josefino Ligan si alyas Eba, 42, dahil sa kasong carnapping.

Pinangunahan ni P/Maj. Darwin Decano ng District Anti-Crime Unit (DACU) ang pagdakip sa akusado sa bisa ng warrant of arrest na inilabas ni Malabon RTC Presiding Judge Rosario Gomez Ines-Pinzon ng Branch 290.

Ang matagumpay na operasyon bahagi ng AAA strategy ni P/MGen. Anthony Aberin, hepe ng National Capital Region Police Office (NCRPO).