ANG paunang imbestigasyon ng Ombudsman sa umano’y pagkakasangkot ni dating Speaker Ferdinand Martin G. Romualdez sa scam sa flood control ay isang “moro-moro” (palabas) lamang, ayon sa isang abogado para sa interes ng publiko at karapatang pantao.

Nagkomento si Antonio “Audie” Bucoy sa pinakabagong pahayag ni Ombudsman Jesus Crispin Remulla na pinatitibay ng kanyang tanggapan ang kasong binubuo nito laban kay Romualdez, na aniya ay maraming pera at mga abogado.

Sa isang panayam sa himpilang radyo na dzBB noong Linggo, inakusahan din ni Bucoy ang Ombudsman na umano’y isinasailalim ang kongresista ng Leyte sa paglilitis sa pamamagitan ng publisidad.

Sinabi niyang nilalabag ng pinakahuling pahayag ni Remulla at ng mga nauna nitong deklarasyon tungkol sa kongresista ng Leyte ang mga prinsipyo ng due process at prejudgment, at ang pangangailangan at layunin ng isang paunang imbestigasyon.

“Ito po ay nilalabag ‘yung panuntunan ng due process and prejudgment. Dapat ho kasi ang preliminary investigation ay tumutukoy para malaman kung merong probable cause na dapat bang usigin sila,” aniya.

“Ngayon, kung may ganitong deklarasyon na eh di nilalabag nito ‘yung mismong layunin ng preliminary investigation dahil ano ‘yung preliminary investigation ay moro-moro lang ba. Ito ba’y pormalidad lang,” aniya.

Itinuro ni Bucoy na tila nakapagpasya na si Remulla na magsampa ng mga kaso laban kay Romualdez sa kabila ng nagpapatuloy na paunang imbestigasyon.

“Sapagkat ano eh, may disisyon na. Sinasabi na niya na handa na ‘yung asunto at sa susunod na araw o linggo ay isasampa na,” dagdag niya.

Binigyang-diin niya na tila nagsasagawa ang Ombudsman ng paglilitis sa pamamagitan ng publisidad at pagkokondisyon ng isip kahit bago pa makapagharap ng ebidensya sa kalagitnaan ng isang paunang imbestigasyon.

“Ang nangyayari ho dito ‘yung paglilitis ay ginaganap sa media. Parang nagiging bahagi ho ito ng mind conditioning eh na inilalako na itong mga taong ito ang sangkot bago pa man magkaroon ng katibayan,” aniya.

“At lalo’t higit nasa gitna ho tayo ng ano ng preliminary investigation. So, bakit may conclusion na. So, moro-moro ito (palabas lamang ito),” muli niyang iginiit.

Sinabi ng abogado para sa interes ng publiko at karapatang pantao na nilalabag ng mga pahayag ng Ombudsman ang konstitusyonal na karapatan ni Romualdez na ituring na inosente hanggang mapatunayang nagkasala.

“May malubhang paglabag dun sa presumption of innoncece. Kasi ho sa ating, nakapaloob sa ating Saligang Batas. Kasi ho ‘yung presumption of innocence ay mananaig hangga’t hindi mo napapatunayan na nagkasala ang iniimbestahan,” aniya.

Ipinapakita rin ng mga deklarasyon ang pagkiling sa panig ng Ombudsman at sinisira ang integridad ng kanyang tanggapan, aniya.

“Nagkakaroon ho ng institutional bias. ‘Yung mga deklarasyong ganito nung Ombudsman ay nasisira ho ‘yung intigridad nung Office of the Ombudsman,” dagdag niya.

Bukod dito, sinabi ni Bucoy na pinahihina ng mga pahayag ni Remulla ang tiwala ng publiko sa sistema ng hustisya.

“Itong mga ganitong pamamahayag eh pumipinsala ho ito sa perception ng publiko at pinahihina nito ang tiwala sa sistema ng hustisya,” aniya.