IPINAHAYAG ni Senate President Francis “Chiz” G. Escudero ang kanyang pagkabahala sa mga pahayag na binitiwan kamakailan ni Vice President Sara Duterte, na kanyang tinawag na hindi angkop para sa isang opisyal na humahawak ng ikalawang pinakamataas na posisyon sa bansa.

Sa isang opisyal na pahayag, nanawagan si Escudero kay Duterte na pag-isipan ang kanyang mga aksyon at ang posibleng pinsalang dulot ng kanyang mga pahayag.

Binigyang-diin niya ang kahalagahan ng pagiging mabuting halimbawa, lalo na para sa mga empleyado ng gobyerno at sa sambayanang Pilipino.

“She should keep in mind that as a public official, she has a duty to set an example for the personnel in the Office of the Vice President and our fellow Filipinos, especially our children,” ani Escudero.

Nanawagan din si Escudero sa lahat ng panig na bawasan ang tensyong dulot ng kontrobersyal na mga pahayag ni Duterte, kabilang na ang mga banta at akusasyon laban kina President Ferdinand Marcos Jr., First Lady Liza Marcos, at House Speaker Martin Romualdez.

Hinimok niya ang mga malalapit kay Duterte na bigyan ito ng maayos na payo at gabay upang maiwasan ang karagdagang mapanulsol o posibleng kriminal na mga pahayag.

“I urge those who are close to her—those who truly care about her as a person and as a leader—to advise her to refrain from making these indecorous and possibly criminal statements in public. These do not benefit the Vice President, her office, or our country,” ani Escudero.

Binigyang-diin din ng Senate President ang pangangailangan ng mga opisyal ng gobyerno na bigyang-priyoridad ang mga agarang isyung kinakaharap ng bansa kaysa sa pagsali sa mga mapanirang pahayag.

“Our government has urgent and pressing concerns it must address—matters that directly affect the lives and livelihoods of the Filipino people. It is imperative that we as public officials focus our energy and attention on resolving these issues,” dagdag pa niya.

Pinaalalahanan ni Escudero ang mga opisyal ng gobyerno na sumunod sa Code of Conduct, na nag-aatas ng pagiging propesyonal at kahusayan sa pagganap ng kanilang mga tungkulin at pananalita.

Nanawagan siya kay Duterte na pagnilayan kung ang kanyang mga kamakailang aksyon at pahayag ay nagsisilbi sa interes ng bayan at ng sambayanan.

“Ultimately, as public servants, our actions should always be guided by this fundamental question: do my actions serve our people and benefit the country that we all love?” pagtatapos ni Escudero.

Ang pahayag ng Senate President ay inilabas sa gitna ng lumalaking pagkabahala ng publiko sa mga pahayag ni Duterte at ang posibleng epekto nito, kasama ang panawagan na magpokus ang pamahalaan sa maayos na pamamahala at pagharap sa mga hamon ng bansa.