GINANAP ang ika-33 anibersaryo ng Pistahan Parade and Festival sa San Francisco at nanguna ang Philippine Consulate General sa San Francisco, Philippine Trade and Investment Center-Silicon Valley (PTIC-SV), Department of Tourism (PDOT) at Philippine Center San Francisco sa okasyon upang ipakita ang suporta sa Fil-Am community doon.

Kinatawan ng komunidad si Konsul Heneral Arnel Talisayon bilang community grand marshal.

Pinasalamatan niya ang Filipino American Arts Exposition (FAAE), mga volunteers at sponsors na nagpagod para sa selebrasyon ng kulturang Pinoy sa Bay Area.

Dumalo si San Francisco Mayor Daniel Lurie at pinuri si FAAE President Al Perez at ang SOMA Pilipinas sa kanilang ika-10 anibersaryo.

Dumalo rin sina Stephanie Reese, Celebrity Grand Marshal; Raquel Redondiez (SOMA Pilipinas Director)-Legacy Grand Marshal at Jessica Caloza (California State Assembly member)-Hermana Mayor.

Napuno ang Yerba Buena Gardens ng mga pavilion na nagtampok ng sining at sayaw.

Naging blockbuster din ang booth ng Konsulado kung saan bukod sa serbisyong pampasaporte at overseas voting info, namahagi pa ng libreng pagkain.

Nagtapos ang pista sa mga pangkulturang pagtatanghal at performance ng Broadway at OPM hits mula kay Stephanie Reese.