NAGKAROON ng matagumpay na operasyon ang mga ahente ng Philippine Drug Enforcement Agency (PDEA) noong nakaraang Miyerkules sa Sta. Ana, Maynila, kung saan nabuwag ang isang tagong drug den at naaresto ang tatlong suspek — kabilang ang isang 76-taóng gulang na lola.

Ayon kay PDEA Director General, Undersecretary Isagani R. Nerez, nakilala ang mga suspek sa kanilang mga alyas na “Gloria,” 76; “Jen,” 49; at “Gelo,” 37, pawang mga residente ng Barangay 745, Sta. Ana, Maynila.

Sila ay nahaharap sa kasong kriminal sa ilalim ng Republic Act 9165 o ang Comprehensive Dangerous Drugs Act of 2002.

Sinabi ng opisyal na isinagawa ng mga tauhan ng PDEA National Capital Region, sa pakikipag-ugnayan sa Manila Police District, ang operasyon bandang 3:45 ng hapon noong Miyerkules.

Nakumpiska sa operasyon ang pitong heat-sealed plastic sachets na naglalaman ng humigit-kumulang 15 gramo ng shabu na tinatayang nagkakahalaga ng ₱102,200, pati na ang buy-bust money na kinabibilangan ng isang minarkahang pera.

Ayon kay Usec. Nerez, muling pinatunayan ng matagumpay na operasyon ang walang humpay na dedikasyon ng PDEA-NCR sa pagpapatindi ng kampanya laban sa iligal na droga at sa pagbuwag ng mga drug den na patuloy na umiiral sa mga komunidad ng Metro Manila. Pinamumunuan ang yunit ni Director Derrick Arnold C. Carreon.