PINAGTITIBAY ng mga mambabatas, mga opisyal ng Kamara de Representantes at mga katuwang mula sa “ASEAN Inter-Parliamentary Assembly (AIPA)” ang kanilang kahandaan para sa pagdaraos ng 47th AIPA General Assembly na gaganapin sa Maynila.

Kabilang sa mga paghahanda ang Capacity Development Programme na layuning palakasin ang kaalaman at kakayahan ng mga kalahok hinggil sa mga proseso ng AIPA, parliamentary diplomacy, consensus-building, committee work, at paghahanda ng mga resolusyon at iba pang dokumentong pangparlamentaryo.

Ayon kay TINGOG Party List Rep. Jude A. Acidre, higit pa sa simpleng paghahanda para sa isang pagpupulong ang naturang programa dahil nakatuon ito sa pagpapalakas ng mga tao at institusyong nasa likod ng gawaing pangparlamentaryo.

“Ang Capacity Development Programme ay higit pa sa isang paghahanda. Ito ay pamumuhunan sa mga tao at institusyong nasa likod ng ating gawaing pangparlamentaryo,”** ayon kay Acidre.

Binigyang-diin din ni Acidre ang kahalagahan ng pagkakaroon ng isang delegasyong Pilipino na hindi lamang handang dumalo sa mga talakayan kundi may kakayahang magbigay ng makabuluhang ambag sa mga usaping mahalaga sa rehiyon.

Sa pagdating ng mga kinatawan mula sa iba’t ibang bansa ng ASEAN, layunin ng Pilipinas na maging handa ang delegasyon sa mga talakayang magsusulong ng regional cooperation at tutugon sa mga magkakatulad na hamon ng mga bansa sa Timog-Silangang Asya.

“Habang naghahanda tayong tanggapin ang ating mga kapwa mula sa ASEAN, kailangang matiyak na ang delegasyon ng Pilipinas ay hindi lamang handang makilahok, kundi may kakayahang makapag-ambag nang makabuluhan sa mga talakayang magsusulong ng kooperasyon at tutugon sa mga magkakatulad na suliranin ng ating rehiyon,” sabi pa ng kongresista.

Ayon pa sa kaniya, mahalagang kasangkapan ang “parliamentary diplomacy” upang mapalalim ang pagkakaunawaan ng mga bansa, makabuo ng pagkakasundo at mapalakas ang tinig ng Pilipinas sa ASEAN.

Sa pamamagitan ng AIPA, nagkakaroon ng karagdagang plataporma ang mga mambabatas upang makipag-ugnayan sa kanilang mga katapat sa ibang bansa, magpalitan ng pananaw at maghanap ng mga solusyong kapaki-pakinabang sa buong rehiyon.

Ang 47th AIPA General Assembly sa Maynila ay inaasahang magsisilbing mahalagang pagkakataon upang higit na mapalakas ang ugnayan at kooperasyon ng mga bansang ASEAN sa pamamagitan ng parliamentary diplomacy.