ANG bagong OCTA Research survey na nagpapakitang mayorya ang sumusuporta sa isang impeachment trial para kay Pangalawang Pangulo Sara Z. Duterte sa Mindanao at sa lahat ng antas ng kabuhayan ay sumasalamin sa malawak at lumalaking paniniwala ng publiko na dapat hayaang umusad ang prosesong konstitusyonal.

Malugod na tinanggap ni Deputy Speaker Paolo Ortega V ng La Union noong Lunes ang mga bilang, at sinabing nakahihikayat na ang suporta sa paglilitis ay pinagtitibay hindi lamang sa buong bansa kundi maging sa Mindanao at sa mga respondent mula sa Class C, D, at E.

“Magandang makita na ang suporta sa impeachment trial ay may malinaw na majority sa Mindanao at sa iba’t ibang socioeconomic classes. Ibig sabihin, mas dumarami ang nakakaunawa dito at mas marami na ang humihingi ng accountability sa ating mga opisyal,” ani Ortega.

Ang OCTA “Tugon ng Masa” survey, na isinagawa mula Marso 19 hanggang 25 sa pamamagitan ng face-to-face interviews sa 1,200 adult respondents, ay natuklasan na 69 porsiyento ng mga Pilipino ang naniniwalang dapat humarap si Duterte sa paglilitis sa harap ng Senado na kikilos bilang Impeachment Court.

Ang pangunahing resulta ng OCTA survey ay 69% ng mga Pilipino sa buong bansa ang sumusuporta sa isang Senate impeachment trial para kay VP Sara Duterte, habang 28% ang tutol at 3% ang hindi pa nakapagpasya.

Sa mga pangunahing rehiyong heograpikal, umabot sa 61 porsiyento ang suporta sa Mindanao, samantalang 38 porsiyento ang tumututol at 1 porsiyento lamang ang hindi pa tiyak.

Para kay Ortega, may espesyal na kahulugan ang bilang sa Mindanao dahil matagal nang itinuturing ang rehiyon bilang isa sa pinakamalalakas na base politikal ng Pangalawang Pangulo.

“Pati sa Mindanao, kung saan inaasahan ng marami na pinakamalakas ang simpatiya para sa Vice President, majority pa rin ang nagsasabing ituloy ang trial. Para sa akin, ang sinasabi niyan ay handa ang mga tao na pakinggan ang buong katotohanan at hayaang umandar ang proseso,” ani Ortega.

Natuklasan din sa parehong OCTA survey na mayorya ang suporta sa lahat ng socioeconomic groups: 71 porsiyento sa Class ABC, 72 porsiyento sa Class D, at 54 porsiyento sa Class E.

Ayon kay Ortega, ipinapakita ng mga bilang na ang pananaw ay hindi limitado sa iisang uri ng mamamayan kundi ibinabahagi sa mas malawak na bahagi ng lipunan.

“Mahalaga rin na majority ang support sa lahat ng socioeconomic classes. Ibig sabihin, hindi ito pananaw ng iisang grupo lang, kundi pananaw na tumatawid sa iba’t ibang bahagi ng lipunan, at para sa akin, mas nagpapatibay iyan sa legitimacy ng proseso,” ani Ortega.

Ipinakita rin ng survey na nananatiling mataas ang kaalaman ng publiko tungkol sa mga reklamong impeachment laban kay Duterte, na nasa 87 porsiyento sa buong bansa, at mas mataas pa sa Mindanao na umabot sa 91 porsiyento.

Ayon kay Ortega, lalo nitong pinagtitibay ang kahalagahan ng resulta sa Mindanao dahil ipinapahiwatig nitong ang suporta ay hindi dahil sa kakulangan ng kaalaman, kundi mula sa isang publikong sumusubaybay sa isyu.

Sinabi rin niya na ang survey ay hindi dapat ituring na sandatang pampulitika, kundi bilang pahiwatig mula sa publiko na nais ng mga Pilipino—kabilang ang nasa rehiyon ng Pangalawang Pangulo at mga karaniwang mamamayan—na masagot ang mga alegasyon sa tamang proseso.

“Sa akin, ang pinakamagandang mensahe dito ay may tiwala ang mas nakararami sa ating mga institusyon. At kung may mga tanong na dapat sagutin, mas maigi na masagot iyon sa isang proseso na bukas, pormal at naaayon sa batas,” ani Ortega