HINDI bababa sa 10 flood control projects na nagkakahalaga ng bilyong piso sa Davao Region ang natuklasang umano’y “ghost, problematic, or poorly situated,” ayon sa House committee on infrastructure.

Ibinunyag ito ni Bicol Saro Party-list Rep. Terry Ridon, ang co-chairman ng panel, sa isang briefing nitong Martes sa mga mamamahayag sa House of Representatives, kung saan ipinakita niya ang tinawag niyang umano’y “disturbing pattern of irregular and unimplemented flood-control projects” na bahagi ng P51-bilyong alokasyon para sa unang distrito ng lungsod.

Sa kanyang PowerPoint presentation, ipinaliwanag ni Ridon na ang mga natuklasan ay pinangkat sa limang kategorya batay sa datos ng Department of Public Works and Highways (DPWH) ― “No Structure Projects,” “Problematic Projects,” “Incomplete Projects,” “Poorly Situated Projects” at “Unconstructed Projects.”

“So, just like in Bulacan where it was very clear that there were ghost projects, I think the ICI (Independent Commission for Infrastructure) have every reason to inspect and investigate from the district engineers’ office in these areas on what really happened to these projects,” ani Ridon.

“These are not 2025 projects, but these were 2021, 2022 and 2023 projects that are all incomplete. In fact, in less than two years some of the projects were already severely damaged,” sinabi pa niya, at binanggit na ang ilan sa mga proyekto ay hawak ng Timothy Corp., isang kumpanyang umano’y pag-aari ng mag-asawang Discaya.

“Some were never started,” dagdag pa ni Ridon.

Aminado si Ridon na ang mga flood control project ay ipinatupad sa bayan ni dating Pangulong Rodrigo R. Duterte at sa unang distrito na kinakatawan ng kanyang anak na si Congressman Paolo Duterte, na may P51 bilyong alokasyon mula 2020 hanggang 2022, bago matapos ang termino ng kanyang ama ― na kinumpirma ni dating DPWH Undersecretary Maria Catalina Cabral sa isang pagdinig ng House Infrastructure Committee.

“So, if the epicenter of ghost flood control projects in Luzon is Bulacan, then the epicenter of ghost flood control projects in Mindanao is in Davao Occidental where the DPWH reported ‘no structure projects’,” sinabi ni Ridon.

Hindi pa matukoy ang aktwal at kabuuang halaga ng lahat ng proyekto dahil nasa paunang yugto pa lamang ang imbestigasyon.

Ayon kay Ridon, maaaring i-endorso ng komite ang mga natuklasan sa ICI o direktang magsampa ng kaso sa Office of the Ombudsman para sa nararapat na aksyon.

“But the ICI has more of the mandate to file the cases before the Ombudsman,” ayon kay Ridon.

Kabilang sa mga lugar na may diumano’y ghost projects ay ang Barangay Kiangan at Barangay Little Baguio sa Malita, Davao Occidental, pati na rin ang Tadamo River at Maa Creek sa kahabaan ng Don Julian Rodriguez Avenue sa Davao City.

Kasama rin sa listahan, ayon kay Ridon, ang umano’y revetment sa Davao River sa Barangay 8-A, ang seawall na nag-uugnay sa Barangay San Jose at Barangay Gov. Vicente Duterte sa Agdao, at ang seawall sa Bucana na umaabot sa Davao River sa Pangyan, bukod sa iba pang kuwestiyonableng lokasyon.

Sinabi ni Ridon na ang ilan sa mga “poorly situated projects” ay itinayo sa mga lugar na “don’t protect vital assets” at nagpapalala pa sa “increasing the flooding downstream.”

“This involves not just one district but all districts in Davao,” dagdag niya.