HINILING ng House prosecutors sa Senate impeachment court na buksan ang selyadong kahon ng Bureau of Internal Revenue na naglalaman ng tax-related documents ni Vice President Sara Duterte at asswang si Atty. Manases Carpio bilang bahagi ng pre-trial proceedings sa impeachment case.

Ayon sa prosekusyon, maaaring may kaugnayan ang mga dokumento sa article of impeachment tungkol sa umano’y unexplained wealth.

Hiniling nila na buksan ang kahon sa pre-trial stage upang masuri ang laman nito at, kung papayagan, ma-markahan bilang posibleng ebidensiya.

“Sa tingin namin that would aid also in a more efficient and more expeditious conduct of trial kung mabuksan na rin ‘yan ngayon during this stage of pre-trial,” sabi ni House prosecutor Leila de Lima.

Sinabi ni Senate Secretary Renato Bantug Jr., clerk ng Senate impeachment court, na hindi maaaring resolbahin ng pre-trial conference lamang ang kahilingan.

Ayon kay Bantug, kailangan itong talakayin kay Senate President Sherwin Gatchalian at kung kinakailangan, sa mga miyembro ng Senate impeachment court.

Nauna nang dinala sa House proceedings ang selyadong BIR box, ngunit bumoto ang House justice panel na huwag muna itong buksan sa yugtong iyon.

Iniwan sa Senate impeachment court ang pagpapasya kung maaaring buksan at gamitin sa impeachment trial ang tax-related documents.

Ang kahilingan ay kabilang sa mga isyung tinatalakay sa pre-trial conference, kasabay ng marking of documents na isinumite ng prosekusyon at depensa.

Sinabi ni Bantug na nananatili ang July 6 schedule para sa simula ng trial proper, bagama’t masikip ang timetable dahil hindi pa tapos ang evidence-marking process.

Layunin ng pre-trial conference na ayusin ang marking of evidence, listahan ng mga testigo, admitted facts at iba pang usapin bago magsimulang dinggin ng senator-judges ang kaso.

Nahaharap si Duterte sa impeachment allegations na kinabibilangan ng umano’y misuse of public funds, unexplained wealth at iba pang paratang na nakasaad sa articles of impeachment.

Itinanggi niya ang wrongdoing at sinabi na politically motivated ang kaso.

Inaasahang pagpapasyahan ng Senate impeachment court kung maaaring buksan ang selyadong tax-related documents, kung sino ang maaaring sumuri sa mga ito, at kung maaari itong ma-markahan o tanggapin bilang ebidensiya.