EPEKTIBO na ang suspension laban kay Sen. Jinggoy Estrada kaya nabuksan ang usapin kung maaari pa siyang maupo bilang senator-judge sa impeachment trial ni Vice President Sara Duterte habang umiiral ang kautusan, ayon kay Senate Secretary Renato Bantug Jr..

“The Senate President’s office has officially informed us that the Sandiganbayan suspension order took effect on Monday, June 22,” ani Bantug.

Sinabi ni Bantug na may legal na usaping kailangang maingat na sagutin, ngunit kinumpirma niyang suspendido si Estrada bilang senador.

Ayon kay Bantug, sa kanyang personal na pananaw, maaaring makaapekto rin ang suspension sa papel ni Estrada bilang senator-judge dahil ang isang senador ay nakauupo sa impeachment court dahil sa kanyang pagiging miyembro ng Senado.

Lumitaw ang usapin habang nagpapatuloy ang paghahanda ng Senado para sa impeachment trial ni Duterte, na nakatakda pa ring magsimula sa July 6.

Kailangan ding masuspinde ang sweldo at benepisyo ni Estrada dahil hindi maaaring gumanap ng opisyal na tungkulin ang isang suspendidong senador.

“Salaries and benefits will have to be suspended because you’re not allowed to perform your functions. I’ll be submitting my recommendation to the SP regarding those matters when I go up to him later,” sabi ni Bantug.

“So the office is still there. The staff can still continue to function because at a certain point the suspension will be lifted,” ani Bantug.

Hindi nagbigay si Bantug ng pinal na pasya sa lahat ng legal na epekto ng suspension, at sinabing may mga usaping kailangang dumaan sa tamang proseso.

Ipinataw ng Sandiganbayan ang 90-day preventive suspension kay Estrada kaugnay ng graft case. Itinanggi ni Estrada ang anumang pagkakasala.