HINIKAYAT ng pamahalaang lungsod ng Quezon ang mga kalalakihan sa lungsod na basagin ang kanilang katahimikan kapag nakakaramdam na ang mga ito ng suliranin sa mental health at humingi ng tulong kung kinakailangan.

Ginawa ni Mayor Joy Belmonte ang paghihikayat kasabay ng pag-obserba ng Men’s Mental Health Awareness Month.

Sinabi ni Belmonte, madalas na aasahan natin na matikas at hindi susuko subalit kailangan na baguhin ang ganitong pananaw dahil “it’s okay not to be okay.”

“Tao lang tayo. Walang mali sa pag-iyak, pagiging emosyonal, o paghingi ng tulong. These are not signs of weakness—but of courage and resilience. Every man deserves to be heard, supported, and healed,” ani Belmonte.

Sa kabila ng pagtaas ng mga hamon sa mental health, patuloy sa pakikibaka ang mga lalaking Pilipino sa pagkilala sa kanilang emotional distress at ang pag-access sa professional support.

Sa isinagawang national assessment ng Department of Health (DOH) at IDinsight noong 2024, nabatid ang mga kakulangan sa mental health literacy sa mga kalalakihang Pilipino.

Batay sa naturang assessment, nang iprisenta sa kanila ang mga karaniwang mental health scenario, 33.9 porsiyento lamang nakatukoy sa senyales ng anxiety; 32.6% lamang ang natukoy ang eating disorder; 38.4% ang nakatukoy ang bipolar disorder at 49.6% ang nakatukoy sa sintomas ng depression.

Kahit na matukoy ang sintomas, sinabi ng may 27% ng mga respondent na kanilang irerekomenda na humingi ng professional help para sa depression.

Ayon naman sa QC Health Department, sinasalamin ang naturang landscape sa lungsod Quezon dahil isa lamang sa limang pasyente na may access sa mental health service ay lalaki.

Noong 2023, sa kabuuang suicide case sa lungsod, 84% dito ay lalaki samantalang sa bilang na 21,156 na katao na may recorded mental or psychosocial disabilities, 53.5% o 11,310 ay lalaki, batay sa datos ng Persons with Disability Affairs Office (PDAO).

Ayon naman kay QCHD OIC Dr. Ramona Abarquez, na-attribute ang mga naturang bilang sa deeply rooted cultural expectation.

“Denial, lack of self-awareness, and stigma often discourage men from seeking care. For many, asking for help is wrongly perceived as weakness. But true strength lies in vulnerability and self-care,” ani Abarquez.

Upang matugunan ang kakulangan sa access at awareness, pinaigting ng pamahalaang lungsod ang mga serbisyo nito sa gender-inclusive mental health.

Dagdag ni Belmonte, nagbibigay na ang lahat ng 67 city health centers ng libreng mental health consultations at screenings.

Mayroon din anim na Mental Wellness Access Hubs sa lungsod na nagbibigay ng assessment, diagnosis, at libreng prescription medication para sa mga kwalipikadong pasyente.

Maaari namang tumawag ang mga residente sa Helpline 122 para sa agarang psychosocial support at crisis intervention. Sinanay ang mga call agent sa suicide response, psychological first aid, at trauma-informed support samantalang nagsanay din ang lahat ng barangay official sa pag-assist sa mga residente na nahaharap sa trauma lalo na yung mga survivor ng violence, disaster, o pagkawala ng kanilang kapamilya.

“With only 20% of men seeking help, systemic reforms are urgently needed,” ani Dr. Abarquez.

“Expanded services, targeted awareness campaigns, and the destigmatization of emotional vulnerability are essential if we are to save lives and promote true well-being,” dagdag pa ni Abarquez.