NANAWAGAN si Department of the Interior and Local Government (DILG) Secretary Juanito Victor C. Remulla sa Kongreso na amyendahan ang tinatawag na “Robin Padilla Law” upang gawing hindi maaaring piyansahan ang iligal na pagmamay-ari ng baril sa bansa.

Ayon kay Remulla, ang kasalukuyang batas na nagbago sa parusa para sa illegal possession of firearms ay nagresulta umano sa pagdami ng mga krimeng kinasasangkutan ng mga loose firearm dahil maaari pa ring makapagpiyansa ang mga akusado.

“Nanawagan ako sa Kongreso na gumawa ng batas na muling magpapabalik sa pagiging non-bailable ng illegal possession of firearms upang mapigilan ang mga krimen,” ani Remulla.

Ang tinutukoy ng kalihim ay ang Republic Act No. 8294, na nag-amyenda sa mga parusa sa iligal na pagmamay-ari ng baril sa ilalim ng dating Presidential Decree No. 1866.

Ang batas na ito ay tinawag na “Robin Padilla Law” dahil nakinabang umano rito si Senador Robin Padilla matapos itong maisabatas noong 1997 habang siya ay nagsisilbi ng sentensiya kaugnay ng paglabag sa PD 1866.

Inilabas ni Remulla ang panawagan kasunod ng mga insidente ng pamamaril sa ilang lugar, kabilang ang mga insidenteng kinasangkutan ng mga estudyante at mga baril na pagmamay-ari ng mga awtorisadong may-ari.

Sa pamamaril sa isang paaralan sa Tacloban City, tatlong estudyante ang nasawi at 20 iba pa ang nasugatan matapos umano gumamit ang suspek ng baril na pag-aari ng kanyang tiyahin na isang law enforcement personnel.

Sa isa namang insidente sa Mindanao, isang 14-anyos na estudyante ang nasangkot sa pamamaril matapos umano makuha ang baril ng kanyang kapatid na sundalo. Isang 15-anyos na estudyante ang nasawi habang dalawa pa ang nasugatan.

Ayon kay Remulla, kailangang papanagutin hindi lamang ang gumagamit ng baril kundi pati ang may-ari nito kung mapapatunayang naging pabaya sa pag-iingat ng armas.

“Hindi nila inaalagaan ang mga baril nila. Kapag nakuha ng bata ang baril, reckless imprudence lamang ang maaaring maging kaso. Walang sapat na parusa sa may-ari ng baril,” ani Remulla.

Iginiit ng kalihim na dapat pag-aralan ng Kongreso ang panibagong batas na magpapataw ng mas mabigat na pananagutan sa mga may-ari ng baril, lalo na’t malaking bahagi ng gun-related crimes sa bansa ay gumagamit ng loose firearms.

Samantala, iniutos din ni Remulla ang mas mahigpit na operasyon laban sa mga uniformed personnel na posibleng gumagamit ng lumang uniporme at service firearms sa paggawa ng ilegal na gawain.

Ayon sa rekord ng Philippine National Police (PNP), tinatayang nasa 2.78 milyon ang loose firearms sa bansa, kabilang ang humigit-kumulang 78,000 na umano’y nasa kamay ng mga law enforcement agent.