SA selda ang diretso ng rider na sinita dahil sa hindi angkop na pananamit matapos makuhanan ng hindi lisensiyadong baril noong Biyernes sa Caloocan City.

Tinakasan ng rider na naka-tsinelas at sando ang mga pulis ng Caloocan Police Sub-Station-9 sa checkpoint sa Malapitan Road, Brgy. 171, Bagumbong dakong alas-11:00 ng gabi kaya siya hinabol.

Nang matiklo at kapkapan, nakuha sa suspek ang isang kalibre .45 baril, anim na bala sa magazine at isa pang extra magazine na may apat na bala.

Nabigong makapagpakita ng lisensiya at permit sa pagdadala ng baril ang suspek kaya nahaharap sa mga kasong paglabag sa RA 10591 o ang Comprehensive Firearms and Ammunition Act.