SINABI noong Biyernes ni House Committee on Public Accounts Chair Terry Ridon na malinaw ang mensahe ng pinakabagong survey ng Tangere kay Bise Presidente Sara Duterte: sagutin ang mga alegasyon sa isang pormal na forum, hindi mula sa gilid.

Ayon sa survey na iniulat noong Huwebes, 88 porsiyento ng mga respondent ang naniniwalang dapat tugunan ni Duterte ang mga paratang laban sa kanya sa isang impeachment trial sa Senado—na tinitingnan hindi bilang parusa, kundi bilang tamang lugar upang ipagtanggol ang sarili.

“Para sa akin, simple ang 88 porsiyento na iyan. Gusto ng publiko ng sagot, hindi ingay,” ani Ridon. “Kung mali ang paratang, humarap ka at sagutin mo sa tamang forum.”

Ayon kay Ridon, sumasalamin ang resulta sa mga lumabas sa mga pagdinig ng Kamara: mga rekord na naglalatag ng malinaw at maiintindihang tanong tungkol sa idineklarang yaman at malalaking galaw ng pera.

Binanggit niya ang mahahalagang datos mula sa mga opisyal na rekord, kabilang ang mga SALN ni Duterte na walang idineklarang cash o bank deposits mula 2019 hanggang 2024, kasabay ng ulat ng Anti-Money Laundering Council (AMLC) na nagsasaad ng ₱6.77 bilyon na covered at suspicious transactions na may kaugnayan sa kanya at sa kanyang asawa na si Atty. Manases Carpio.

“Hindi ito maliliit na isyu. Tumutukoy ito sa idineklarang yaman, galaw ng pera, at opisyal na rekord,” aniya. “Hindi nakapagtataka na halos siyam sa bawat sampung Pilipino ay naghahanap ng malinaw na sagot.”

Binigyang-diin ni Ridon na hindi lamang ang pagkakaroon ng mga transaksyon ang isyu, kundi ang laki at pinagmulan ng mga pondong sangkot.

“Hindi lang ito simpleng galaw ng pera. Kapag may bilyon-bilyong transaksyon, kailangang malinaw kung saan nanggaling at paano ito nabuo,” aniya.

Dagdag pa niya, kahit pa sabihing dumaan lamang ang pera sa mga account, nananatili pa rin ang pangunahing tanong.

“Kahit sabihin nating umikot lang ang pera, hindi nawawala ang tanong—saan nanggaling ang bilyong pumasok?” ani Ridon.

Ayon kay Ridon, hindi teknikal na paliwanag ang hinahanap ng publiko, kundi linaw sa pagitan ng idineklarang yaman at aktwal na galaw ng pera.

“Hindi komplikado ang usapin: may malalaking transaksyon, at may kailangang ipaliwanag sa records,” aniya.

Binanggit din niya na malapit nang matapos ang proseso sa Kamara, at nakatakdang idaos ng Committee on Justice ang susunod—at inaasahang huling—clarificatory hearing sa Abril 29.

“Inaasahan naming makita ang Bise Presidente roon,” ani Ridon. “Doon pinapakita ang tapang—sa harap ng ebidensiya, hindi sa labas.”

Para kay Ridon, ang survey ay hindi tungkol sa palabas kundi sa pananagutan.

“Kapag 88 porsiyento na ang nagsasabing sumagot sa formal proceeding, hindi na puwedeng iwasan,” aniya. “Tama na ang daldal. Magpakita kayo.”

Aniya, inaasahan na ngayon ng publiko ang direktang sagot na nakabatay sa mga rekord.

“Harapin ang ebidensiya. Sagutin ang tanong. Linawin ang rekord,” ani Ridon. “Iyan ang hinihingi ng tao.”

“At kung hindi maipaliwanag ang ganitong kalaking agwat sa pagitan ng kita, idineklara na yaman, at aktwal na galaw ng pera, hindi na ito simpleng isyu ng accounting—ito ay malinaw na usapin ng pananagutan na pumapasok sa paglabag sa tiwala ng publiko.”