ANG pag-iral o kawalan ng pag-iral ni Mary Grace Piattos ang magiging mahalagang salik sa pagtukoy kung wasto bang nagamit ang confidential funds ni Bise Presidente Sara Z. Duterte.

“Ang existence o non-existence ni Mary Grace Piattos ang siyang smoking gun kung tama o mali ang paggamit ng confidential funds,” sinabi ni Bicol Saro Party-list Rep. Terry Ridon, isa sa mga House prosecutor, sa mga mamamahayag.

Ayon kay Ridon, miyembro ng House prosecution team, si Piattos ang nasa sentro ng kontrobersiya kaugnay ng confidential funds ni Duterte.

“Mahalaga si Mary Grace Piattos dahil nasa sentro siya ng kontrobersiya tungkol sa paggamit ng confidential funds,” dagdag niya.

Kinumpirma naman ni House prosecutor at Kinatawan ng Maynila na si Joel Chua na kasama si Piattos sa listahan ng mga testigong isinumite ng prosekusyon sa kanilang pre-trial brief.

Naging pangunahing usapin ang pangalang Mary Grace Piattos sa kontrobersiya ng confidential funds matapos itong lumitaw sa mga dokumentong may kaugnayan sa mga kinuwestiyong liquidation, na kalaunan ay nagbunsod ng mga pagdududa kung tunay ngang umiiral ang naturang tao.

“Kung babalikan natin ang ulat ng COA, marami roon ang malinaw na hindi wastong paggamit ng confidential funds. Kaya nga sa halos bawat taon na may confidential funds ang Pangalawang Pangulo, may mga pondong ipinababalik sa kaban ng bayan,” ani Ridon.

Nang tanungin kung napatunayan na bang tunay na tao si Piattos, tumanggi si Ridon na pangunahan ang mga susunod na hakbang ng prosekusyon.

“Iyan ay isang bagay na makikita nating lahat sa mga susunod na araw,” aniya.

Hindi rin niya isiniwalat kung paano haharapin ng prosekusyon ang usapin kung mapatunayang walang rekord si Piattos sa Philippine Statistics Authority (PSA) o sa civil registry.

“Abangan na lamang natin kung paano hahawakan ng prosekusyon ang partikular na bahaging ito ng mga pagdinig,” aniya.

Tinukoy rin ng mambabatas mula sa Bicol Saro Party-list si dating tagapagsalita ng Department of Education (DepEd) at Office of the Vice President (OVP) na si Michael Poa bilang mahalagang testigo dahil sa kanyang naging papel sa operasyon ng mga tanggapang dating pinamunuan ni Duterte.

“Kasama talaga siya sa mga napakahalagang testigo upang maipaliwanag kung paano isinagawa ang paggamit ng confidential funds at ang kabuuang operasyon ng DepEd at OVP. Kaya tatawagin namin siya upang tumestigo,” ani Ridon.

Binanggit din niya na magkakaroon ng pagkakataon ang depensa na i-cross-examine si Poa kung siya ay ihaharap sa paglilitis.

“Pinahihintulutan naman ang depensa na i-cross-examine siya kapag humarap siya sa witness stand. Sinabi rin naman niya na hangga’t ang mga tanong ay may kaugnayan sa kanyang trabaho sa OVP at DepEd, wala siyang pagtutol dito, at iginagalang namin iyon,” dagdag ni Ridon.

Sinabi rin ni Ridon na ang unang artikulo ng impeachment na planong iharap ng prosekusyon ay ang may kaugnayan sa mga pagbabanta o threats article.

“Sa ngayon, ang unang iminungkahi ng prosecution panel na talakayin ay ang artikulo tungkol sa mga pagbabanta,” aniya.

Dagdag pa niya, handa ang prosekusyon na magharap ng testigo sa unang araw pa lamang ng paglilitis.

“Sa tingin ko, handa naman kaming magpresenta ng testigo sa unang araw,” sabi ni Ridon.