CABANATUAN CITY–Sumabog ang granada na ibinato ng isa sa dalawang sakay ng motorsiklo sa barangay hall ng syudad kung saan natutulog ang barangay chairman noong Sabado.

Walang naiulat na nasaktan sa pagsabog kahit na doon natutulog si Brgy. chairman John Mycon Capinpin, 31, sa barangay hall ng Brgy. Mabini extension dakong alas-4:20 ng umaga.

Makikita sa mga kuha ng closed circuit television ang hindi pa nakikilalang suspek na nakaitim na jacket na may hoodie habang nagmamaneho ng itim na motorcycle.

Sinabi ni Lt. Col. Renato Morales, hepe ng pulisya, na nagsasagawa pa sila ng imbestigasyon para matukoy at maaresto ang suspek.