TIMBOG ang 58-anyos na security guard nang ireklamo ng pananakot at panunutok ng baril noong Huwebes sa Malabon City.

Inabutan pa ng mga pulis si alyas Alfredo na hawak ang kalibre. 45 pistol na may walong bala nang makarating sa mga alagad ng batas ang insidente dakong ala-1:50 ng madaling araw sa Phase 6 ng Gozon Compound, Letre, Brgy. Tonsuya,

Inaresto ang suspek at kinumpiska sa kanya ng mga tauhan ng Malabon Police Sub-Station-5 ang baril nang mabigong makapagpakita ng lisensiya at permit to carry firearm outside residence at firearm registration lang ang papeles na kanyang ipinakita.

Akusado ang suspek ng pananakot at panunutok ng baril ng biktimang si alyas John, 24, sa hindi pa malamang dahilan.

Nahaharap sa kasong paglabag sa RA 10591 (Comprehensive Law on Firearms and Ammunitions) at grave threat ang sekyu sa Malabon City Prosecutor’s Office.