NANAWAGAN si Sen. Loren Legarda ng mas maigting na aksyong pangkapaligiran ngayong Earth Month.

Ayon kay Legarda, ang tumataas na gastos sa enerhiya ay nagtutulak pataas sa singil sa kuryente at pamasahe at kalaunan ay nagdaragdag din sa halaga ng pagkain at iba pang pangunahing bilihin.

“Kapag tumataas ang halaga ng enerhiya, sumusunod ang lahat—mula sa ating pagkain hanggang sa paraan ng ating pamumuhay.

Kaya naman ang pangangalaga sa kalikasan ay hindi na hiwalay sa pangangalaga sa ating ekonomiya at mamamayan,” sabi ni Legarda.

Habang naghahanda ang bansa sa paggunita ng Earth Day sa Abril 22, sinabi ni Legarda na dapat tumugon ang Pilipinas sa tumataas na gastos sa enerhiya at mga sakunang dulot ng nagbabagong klima.

Binanggit niya ang mga solusyong nakabatay sa kalikasan, gaya ng muling pagtatanim ng mga bakawan upang maprotektahan ang mga baybaying komunidad, rehabilitasyon ng mga watershed upang makatulong sa pagtiyak ng suplay ng tubig at pagpapalawak ng luntiang espasyo sa mga lungsod upang mabawasan ang init at mapabuti ang kalidad ng hangin.

Ayon kay Legarda, ang mga hakbang na ito ay maaaring makatulong sa pagprotekta sa mga komunidad at kabuhayan habang hinaharap ng bansa ang mga hamon sa klima at enerhiya.