INAPRUIBAHAN ng Senado ang Senate Bill No. 2699, na kilala bilang Konektadong Pinoy Act, isang panukalang batas na naglalayong palawakin ang akses sa internet sa buong bansa at palakasin ang cybersecurity protections.

Layunin ng panukala na mabawasan ang digital divide sa pamamagitan ng pagbibigay ng mabilis, maaasahan, at abot-kayang internet para sa lahat ng Pilipino, lalo na sa mga malalayong lugar at marginalized communities, kasabay ng pagtugon sa lumalalang banta ng cybercrime at data breaches.

Sa kanyang paliwanag ng boto, binigyang-diin ni Senator Jinggoy Ejercito Estrada ang kahalagahan ng digital access sa makabagong panahon: “In today’s rapidly advancing digital age, access to the internet is no longer a luxury but a necessity. It is the great equalizer—providing opportunities for education, employment, business, and even government services.”

Ipinag-uutos ng panukalang batas ang pagpapatupad ng komprehensibong digital infrastructure program, kabilang ang pagpapalawak ng broadband access sa buong bansa, pamumuhunan sa fiber-optic networks, satellite technology, at iba pang paraan ng koneksyon. Saklaw din nito ang pagpapababa ng halaga ng datos, pagpapalakas ng kumpetisyon sa industriya ng telekomunikasyon, at pagbibigay ng internet discounts sa mga estudyante at sektor na nasa laylayan.

Si Senator Grace Poe, isang pangunahing tagapagtaguyod ng digital reform, ay binigyang-diin ang pangangailangan ng mas kompetitibong sektor ng telekomunikasyon: “We rank fourth in terms of time spent on social media. At least it will open up more players. By easing registration and injecting much-needed competition in our ICT industry, we hope to achieve the internet infra that our digitally hungry kababayans deserve.”

Kasabay ng pagpapalawak ng internet connectivity, tinalakay rin ng Senado ang lumalaking banta ng cybercrime, partikular ang online fraud, identity theft, at phishing schemes. Nanawagan ang mga mambabatas ng mas mahigpit na digital security measures upang maprotektahan ang mga Pilipino mula sa cyber threats.

Ibinahagi ni Senator Sherwin Gatchalian ang kanyang pangamba sa pagdami ng online scams na target ang mga mamimili: “Ang mga cybercriminal ay hindi natutulog. Kailangan nating tiyakin na ang ating digital infrastructure ay ligtas at protektado.”

Inaprubahan ng Senado ang mga hakbang upang obligahin ang digital platforms na palakasin ang kanilang cybersecurity systems, magpataw ng mas mabibigat na parusa para sa cyber-related crimes, at magtayo ng isang National Cyber Defense Center upang labanan ang mga banta sa online security.

Samantala, sinuportahan din ni Senator Poe ang panukalang batas na naglalayong palakasin ang proteksyon ng mga mamimili sa digital transactions, dahil sa pagdami ng mga mapanlinlang na e-commerce activities. Ipinag-uutos ng panukala ang mas mahigpit na verification process para sa online sellers at mas maayos na refund mechanisms para sa mga nabiktima ng panloloko.

Pangungunahan ng Department of Information and Communications Technology (DICT) ang pagpapatupad ng parehong Konektadong Pinoy Act at mga bagong hakbang sa cybersecurity, sa pakikipagtulungan ng mga ahensyang tagapagpatupad ng batas, telecommunications providers, at mga institusyong pampinansyal.

Ipinapakita ng mga hakbang ng Senado ang matibay na layunin na isulong ang digital inclusion at seguridad, upang matiyak na hindi lamang magkakaroon ng akses ang mga Pilipino sa internet kundi mapoprotektahan din sila mula sa cyber threats.

Lilipat na ngayon ang panukalang batas sa Malacañang para sa lagda ni Pangulong Ferdinand Marcos Jr. Kapag naisabatas, inaasahang mapapalakas nito ang digital infrastructure ng bansa at patitibayin ang cybersecurity policies, na magbibigay-daan para sa mas ligtas na akses ng mga Pilipino sa online education, oportunidad sa trabaho, at mahahalagang serbisyo ng pamahalaan.