ISANG mag-aaral ng Ateneo de Zamboanga University High School ang nag-amok at namaril sa loob ng bakuran ng paaralan, kung saan patay ang isang kapwa mag-aaral at marami ang nasugatan humigit-kumulang 7:50 ng umaga ngayong Martes bago nito itinutok ang baril sa kanyang sarili, ayon sa ulat ng pulisya.

May mga paunang ulat na siyam na iba pang indibidwal ang nasugatan sa ginawang pag-atake na nag-udyok sa pulisya na i-lockdown ang lugar at truying hulihin ang namamaril. Gayunpaman, kinokumpirma pa ng pulisya ang eksaktong bilang ng mga biktima.

Paglagpas ng ika-10 ng umaga, inihayag ng Ateneo de Zamboanga Grade School at Junior High School na ang mga mag-aaral ay “ligtas at maayos ang kalagayan” kasunod ng insidente ng pamamaril na iniulat na i-nilivestream pa ng suspek sa kanyang social media account.

Ang suspek, na inulat na anak ng isang lokal na kawani ng customs, ay nakita sa mga kumakalat na video na nagdadala ng mahabang baril at isang pistola bago binaril ang isang biktima na nasa tapat ng isang silid-aralan at kalaunan ay pinaputukan ang iba pang mga tao sa loob.

Matiyagang nakikinig ang mga estudyante sa kanilang guro nang dumating ang suspek at nagsimulang mamaril nang walang anumang provokasyon.

Mabilis na tumakbo sa iba’t ibang direksyon ang mga mag-aaral sa silid-aralan habang lumipat ang suspek sa isa pang silid-aralan at nagpaputok pa sa iba pang mga biktima.

Natagpuan ang bangkay ng isa sa mga biktima sa loob ng gusali na matatagpuan sa Barangay Lunzuran.

Ayon sa paunang ulat ng Philippine National Police (PNP), ang suspek na sinasabing isang mag-aaral sa Grade 7 ay natagpuang patay kasama ang mga baril na nakuha malapit sa kanyang katawan sa isang posibleng kaso ng pagpapakamatay.

Ang mga baril ay binubuo ng isang pistola at isang caliber 5.56 rifle.

Agad na nagtungo ang mga miyembro ng Zamboanga City Police Office sa lugar upang seguraduhin ang bakuran ng paaralang pinapatakbo ng mga Heswita at magsagawa ng masusing imbestigasyon.

Sinabi ni Police Regional Office 9 (PRO9) director, Brigadier General Dennis A. Esguerra, na ang Regional Field Unit 9 ng PNP Forensic Group ay nagsasagawa na ng imbestigasyon sa pinangyarihan ng krimen.

“Inalam natin ang background at profile ng lalaking mag-aaral na iniulat na isang Child-in-Conflict-with-the-Law. Tinitiyak din natin ang mga may-ari at ang legalidad ng mga baril,” ayon sa opisyal.

Inatasan din ni PNP chief, General Jose Melencio C. Nartatez Jr. ang isang imbestigasyon sa mga posibleng pagkukulang ng pamunuan ng paaralan na nagbigay-daan sa suspek na maipasok ang mga baril na ginamit sa pag-atake.

Sinabi ng pinuno ng pulisya na ang mga miyembro ng PRO9 at ng Zamboanga City Police Office ay mabilis na tumugon sa naiulat na pamamaril at agad na nakipag-ugnayan sa mga awtoridad ng paaralan at iba pang kaugnay na ahensya upang matiyak ang kaligtasan at maayos na pagkilos ng mga mag-aaral, guro, at kawani ng paaralan.

“Kontrolado na ang sitwasyon sa ngayon. Hinihikayat din ng PNP ang mga magulang at tagapangalaga na manatiling kalmado at sundin ang payo ng paaralan, lalo na sa nakatakdang oras at mga kaayusan sa pagsundo sa kanilang mga anak,” aniya.

“Makatutulong ito upang matiyak ang isang maayos na proseso at mapahintulutan ang mga tumutugong tauhan na magawa ang kanilang mga tungkulin nang walang hindi kinakailangang pagsisikip. Kasalukuyang inalam ng mga awtoridad ang mga pangyayari sa paligid ng insidente,” dagdag pa ni Gen. Nartatez.

Sinabi ng pinuno ng PNP na magbibigay sila ng beripikadong impormasyon sa tamang panahon habang nanawagan sa publiko na iwasan ang pagbabahagi ng hindi kumpirmadong ulat, larawan, o video na maaaring magdulot ng hindi kinakailangang pangamba.

“Tinitiyak ng PNP sa publiko na ang kaligtasan at kapakanan ng komunidad ng paaralan ay nananatiling prayoridad. Nagpapasalamat kami sa pamunuan ng paaralan, mga magulang, tagapangalaga, at komunidad sa kanilang pasensya, kooperasyon, at pag-unawa habang patuloy na pinamamahalaan ng mga awtoridad ang sitwasyon.

Hinihimok namin ang lahat na manatiling kalmado at umasa sa mga opisyal na anunsyo para sa tumpak at napapanahong impormasyon,” aniya.