IDINEKLARA ng House Committee on Justice noong Miyerkules na may sapat na batayan ang mga reklamong impeachment laban kay Bise Presidente Sara Z. Duterte matapos mabigong direktang tugunan ng kanyang sagot ang mga alegasyon, kaya’t nanatili ang mga ito na hindi natututulan, ayon kay panel Chair Atty. Gerville “Jinky Bitrics” Luistro ng Batangas nitong Huwebes.

Ayon kay Luistro, naging malinaw ito sa deliberasyon ng panel hinggil sa sufficiency in grounds, kung saan napansin ng mga miyembro ang kawalan ng direktang depensa laban sa mga paratang.

“Sa katunayan, ganyan ang nangyari sa sufficiency in grounds. Kasi ang naririnig ko kahapon (Miyerkules) mula sa mga miyembro ng Justice Committee, wala namang inilatag na depensa. Hindi naman sinagot ang mga alegasyon ng offenses. Kaya para sa kanila, nananatiling nakatayo ang mga alegasyon sa reklamo dahil hindi ito kinuwestyon, hindi nirebut, at hindi sinagot,” ani Luistro, na nag-udyok sa mga complainant na i-waive ang kanilang karapatang tumugon matapos hindi direktang sagutin ni Duterte ang mga alegasyon.

Sinabi niya na ang sagot ng Bise Presidente ay hindi tahasang tumugon sa mga paratang na nakasaad sa mga reklamo, kaya nanatiling hindi napasinungalingan ang mga ito.

“Ito ay dahil ang mga alegasyon sa kanyang sagot ay hindi direktang tumugon sa mga alegasyon sa reklamo. Kaya ang naging dating, ang mga alegasyon sa reklamo ay hindi natutulan at nananatiling nakatayo,” paliwanag ni Luistro.

“Dahil hindi sila kinuwestyon, hindi sinagot, at hindi nirebut sa isinampang sagot ng respondent. Ano ang laman ng sagot? Pawang alegasyon lamang ng paglabag sa due process at failure to state ultimate facts,” dagdag niya.

Ayon kay Luistro, ang mga argumentong ito ay wala sa hurisdiksyon ng Justice Committee at dapat na ihain sa Korte Suprema.

“At ang mga ito ay mga usaping hindi na saklaw ng Justice Committee. Ito ay mga bagay na maaaring idulog sa Korte Suprema sa pamamagitan ng petisyon. At para sa karamihan ng mga miyembro, hindi ito maituturing na sagot kundi isang motion to dismiss,” aniya.

Sa kabila ng nagpapatuloy na proseso, binigyang-diin ni Luistro na ang House panel ay hindi kumikilos bilang isang impeachment court, at ang ganap na paglilitis ay nasa kapangyarihan ng Senado.

Aniya, limitado lamang ang papel ng komite sa pagtukoy kung may probable cause batay sa mga ebidensyang ihaharap.

Itinakda ng komite ang pormal na pagdinig sa Marso 25, Abril 14, Abril 22, at Abril 29.