NAGHAIN noong Huwebes ang TINGOG Party-list ng isang panukalang batas na nagbabawal sa paniningil ng reconnection fees para sa kuryente, tubig, telekomunikasyon, at internet, habang patuloy na tumataas ang gastos sa mga pangunahing serbisyo dahil sa pagmahal ng krudo.

Ang House Bill (HB) No. 8706, na kilala rin bilang “No Reconnection Fee Act,” ay naglalayong tiyakin na kapag ganap nang nabayaran ng mga konsyumer ang kanilang mga utang, ang pagbabalik ng serbisyo ay hindi na papatawan ng karagdagang bayarin, bilang bahagi ng pagsisikap na mapagaan ang pinansyal na pasanin ng mga sambahayan.

Ang panukala ay pangunahing isinulat ni Leyte 1st District Rep. Ferdinand Martin Romualdez, kasama sina TINGOG Party-list Reps. Yedda Marie Romualdez, Andrew Julian Romualdez, at Jude Acidre.

Ang paghahain ng panukala ay kasabay ng patuloy na pabago-bagong galaw ng pandaigdigang merkado ng langis, na nagdudulot ng pagtaas sa lokal na presyo ng krudo, na may domino effect sa singil sa kuryente at gastos sa pagpapatakbo ng iba pang mahahalagang serbisyo.

“Habang gumagalaw ang presyo ng krudo, nararamdaman ang epekto nito sa paghahatid ng mga pangunahing serbisyo,” ayon kay Acidre. “Nararanasan ito ng mga sambahayan hindi lamang sa transportasyon, kundi pati sa gastos sa kuryente, tubig, at konektibidad.”

Ayon pa kay Acidre, bagama’t responsibilidad pa rin ng mga konsyumer na bayaran ang kanilang obligasyon, ang pagpapataw ng reconnection fees ay nagdadagdag ng karagdagang gastos sa oras ng pagbabalik ng serbisyo.

“Kapag nabayaran na ang isang account, ang dapat na prayoridad ay ang agarang pagbabalik ng serbisyo,” ani Acidre. “Ang dagdag na bayarin sa yugtong iyon ay maaaring magpabagal sa reconnection, lalo na para sa mga pamilyang may pinansyal na kahirapan.”

Sa ilalim ng panukalang batas, ipagbabawal ang paniningil ng reconnection fees para sa mga account na naputulan dahil sa hindi pagbabayad, basta’t ganap nang nabayaran ang lahat ng natitirang balanse, kabilang ang legal na interes o multa. Mananatili naman ang mga umiiral na probisyon para sa pandaraya, ilegal na paggamit, at mga disconnection na may kaugnayan sa kaligtasan.

Ayon kay Acidre, bahagi ang panukalang ito ng mas malawak na pagsusuri sa mga polisiya bilang tugon sa pabago-bagong presyo ng krudo at epekto nito sa mga pangunahing serbisyo.

“Ang kuryente, tubig, telekomunikasyon, at internet ay mahalagang bahagi na ng pang-araw-araw na buhay,” dagdag ni Acidre. “Ang mga pagbabago sa polisiya ay dapat tumugon sa kung paano nararamdaman ng mga pamilyang Pilipino ang mga gastusing ito, habang tinitiyak na nananatiling abot-kaya at naa-access ang mga serbisyo.”

Inaasahang isasangguni ang panukala sa kaukulang komite ng Kamara para sa deliberasyon.