MAHIGPIT na sumusunod ang House Committee on Justice sa kanilang mga patakaran at sa mga alituntunin ng Korte Suprema (SC) sa pagsasagawa ng mga pagdinig sa impeachment laban kay Bise Presidente Sara Z. Duterte, upang matiyak na walang pinahihintulutang mapang-usisang mga tanong, ayon kay House Committee on Good Government and Public Accountability Chair Joel R. Chua ng Maynila noong Huwebes.

Binigyang-diin ni Chua na mahigpit na ipinatupad ni Justice Committee Chairperson Gerville “Jinky Bitrics” Luistro ng Batangas ang mga patakaran, at tiniyak na ang bawat mapang-usisang tanong mula sa mga miyembro ng panel ay nananatili sa tamang hangganan.

Ayon sa kanya, ang mga miyembrong lumilihis sa nilalaman ng mga isinumiteng ebidensiya at mga affidavit ay agad na pinagsasabihan, mula man sa mayorya o minorya.

Dagdag pa niya, ang mga pinagsabihan ay hindi na tumutol sa pasya ni Luistro, at iginalang ang kanyang pagpapasya kapag ang mga tanong ay lumalagpas na sa layunin ng paglilinaw.

“Credit din sa mga miyembro dahil disiplinado at sumusunod sa proseso—wala kang makikitang nag-grandstanding. Lahat ay focused sa trabaho,” ani Chua sa isang pahayag.

“Lahat nasisita kung kinakailangan. Nasa majority o minority ka man,” dagdag niya.

Ipinaliwanag ni Chua na tinatrato ng Justice committee ang mga clarificatory hearing na parang paunang imbestigasyon ng isang piskal o ng Ombudsman upang matukoy kung may sapat na basehan (probable cause) upang ituloy ang isang kaso.

Ayon sa mambabatas mula Maynila, wala siyang nakikitang dahilan para maglabas ng negatibong komento ang Korte Suprema sa paraan ng paghawak ng Kamara sa mga paglilitis ng impeachment.

“Malaking factor ang naging desisyon ng Supreme Court sa impeachment complaint noong 19th Congress. Dahil dito, tila nabawasan na ang kanilang puwedeng ikatwiran,” aniya.

Pinuna rin ni Chua ang hakbang ni Duterte na humiling ng temporary restraining order (TRO) sa Korte Suprema bago pa man magsimula ang mga pagdinig, at sinabing ang alegasyon ng “fishing expedition” ay maaga at wala sa lugar.

“Nagpunta sila sa Supreme Court kahit hindi pa nasisimulan ang hearing. Sa ganitong sitwasyon, mapapatanong ka kung ano ang ayaw nilang mabunyag. Dahil TRO agad ang kanilang hiniling, nagkakaroon tuloy ng impresyon na baka may itinatago,” ani Chua.

Kinuwestiyon din niya kung paano makadadalo ang bise presidente sa mga pagdinig at makasasagot sa mga alegasyon kung haharap siya sa Committee on Justice, dahil maaari itong magdulot ng dilemma at pahinain ang kanyang pagtutol sa hurisdiksyon ng komite.