NATAPOS na ng Police Regional Office 9 (PRO9) ang imbestigasyon nito sa nakamamatay na insidente ng pamamaril noong Agosto 18 sa Ateneo de Zamboanga High School sa Zamboanga City.

Napag-alaman nitong walang sabwatan sa pag-atake na ikinamatay ng isang estudyante at ng mismong bumaril.

Ayon sa ulat ng PRO9 na pinamumunuan ni Brigadier General Dennis A. Esguerra, natukoy ng imbestigasyon ang mga pangyayari na humantong sa trahedya, gayundin ang pagsasampa ng kasong reckless imprudence resulting in homicide and physical injury laban sa ama ng 15-anyos na Grade 8 student.

Ang imbestigasyon, na isinagawa ng PRO9 Special Investigation Task Group, ay pinagsama ang mga imbestigador at forensic personnel na nagsuri sa mga pahayag ng mga saksi, CCTV footage, pisikal at digital na ebidensya, mga rekord ng paaralan, at ebidensiyang may kaugnayan sa mga baril upang mabuo ang buong pangyayari.

Batay sa mga natuklasan, walang ebidensiyang nagpapakitang ang insidente ay bahagi ng isang sabwatan na kinasasangkutan ng anumang grupo, organisasyon, o iba pang indibidwal.

Wala rin silang natukoy na sapat na dahilan na may kaugnayan sa paaralan o personal na alitan na maaaring magpaliwanag sa pamamaril. Gayunman, natukoy sa imbestigasyon ang naunang paghahanda at pagkakalantad sa mararahas na materyal online bilang ilan sa mga pangyayaring nakapaligid sa insidente.

Ipinakita rin ng imbestigasyon ng PRO9 na ang mga kakulangan sa ligtas na pag-iingat at pananagutan sa mga baril ay nagbigay-daan sa hindi awtorisadong pagkuha sa mga armas na ginamit.

Nakadagdag din sa mga pangyayari ang mga kakulangan sa seguridad ng paaralan, partikular sa pagsusuri sa mga pumapasok at lumalabas.

“Batay sa mga natuklasang ito, isang reklamo para sa Reckless Imprudence Resulting in Homicide and Physical Injury ang isinampa sa kinauukulang prosecutorial authority laban sa rehistradong may-ari ng mga baril na ginamit sa insidente at laban sa isang personnel ng school security, batay sa mga ebidensiyang napatunayan sa imbestigasyon,” ani Brig. Gen. Esguerra.

Sinabi ni Philippine National Police chief General Jose Melencio C. Nartatez Jr. na tungkulin ng PNP hindi lamang na alamin kung ano ang nangyari kundi tiyaking isinagawa ang imbestigasyon nang patas at responsable.

“Utang natin sa mga pamilya at sa komunidad ng paaralan na matukoy nang tama ang mga katotohanan. Hindi puwedeng puro assumptions. Sinusunod natin ang ebidensya, iginagalang ang due process, at hinahayaan ang tamang legal na proseso na tukuyin kung sino ang mananagot. Kasabay nito, kailangan nating matuto mula sa nangyari at isara ang mga puwang sa seguridad na maaaring maglagay sa iba sa panganib,” sabi ng hepe ng PNP.

Pinaalalahanan din niya ang mga may-ari ng baril na maging higit na maingat sa pag-iingat ng kanilang mga armas. Hinikayat din niya ang mga paaralan at security personnel na regular na suriin ang kanilang access controls at mga hakbang sa screening. Hinimok naman ang mga magulang at publiko na agad ipaalam ang anumang alalahanin tungkol sa mga banta, marahas na pag-uugali, o iba pang babalang senyales.

Ipinakita ng imbestigasyon na ang suspek, na sakay ng kotse ng kanyang ama, ay pumasok sa basement ng paaralan gamit ang disabled access ramp upang maiwasang ma-frisk.

Dala niya ang mga baril sa loob ng isang bag. Pagkatapos ay nagsimula siya ng Facebook livestream gamit ang body camera at nagtungo sa pintuan ng isang silid-aralan sa ikaapat na palapag, kung saan itinutok niya ang baril sa isang guro.

Sunod siyang nagpaputok nang paulit-ulit, na ikinamatay ng isang 15-anyos na Grade 10 student, bago niya itinutok ang baril sa kanyang sarili. Isang 15-anyos na babaeng estudyante ang tinamaan ng bala sa likod, habang isang lalaking estudyante ang dinala sa ospital dahil sa hirap sa paghinga matapos bumagsak dahil sa pag-atake.

Ang ama ng suspek na si Lieutenant Lars Jalani II, district commander ng Port of Zamboanga Enforcement and Security Service, ay inalis sa kanyang tungkulin kasunod ng insidente, kung saan nakuha ng kanyang yumaong anak ang kanyang 9mm at caliber .40 na mga pistola.

Ang pistolang ginamit sa pamamaril ay inisyu ng Bureau of Customs (BOC) sa ama ng estudyante, habang ang ikalawang baril ay lisensyado sa pangalan ng nakatatandang Jalani.

Noong Martes, inanunsyo ng Department of Justice na inirekomenda rin ng mga prosecutor sa Tacloban City ang pagsasampa ng kasong reckless imprudence resulting in multiple homicide and physical injuries laban kay Police Staff Sergeant Arla Ray Paciencia, tiyahin ng isa sa mga menor de edad na suspek sa nakamamatay na pamamaril sa isang paaralan sa Tacloban City noong Hunyo 22.

Ang impormasyon para sa kasong maaaring piyansahan ay iniharap sa Family Court ng Tacloban City Regional Trial Court.

Si Paciencia ang may hawak ng PNP-issued 9mm Glock 17 pistol na ginamit ng kanyang 14-anyos na pamangkin sa pag-atake na ikinamatay ng tatlo at ikinasugat ng mahigit 20 katao.

Isinampa ang kaso matapos ang mga alegasyong hindi maayos na naitago ang baril sa tirahan ni Paciencia, na nagbigay-daan upang madali itong makuha ng batang suspek.

Nauna nang sinabi ni Department of the Interior and Local Government Secretary Juanito Victor C. Remulla na iniimbestigahan nila ang pahayag ng opisyal ng Customs na iniwan niya ang kanyang bag ng baril sa loob ng kanyang sasakyan at tila kinuha ito ng kanyang anak nang walang pahintulot.

“Ngunit sa tingin namin, napakaimposible nito. Ang training ng lahat ng law enforcement officers ay tungkol sa gun safety at tamang pag-iingat ng mga baril. Ang turing nila sa kanilang mga baril ay parang sariling baril nila na hindi nila basta iniiwan,” ani Sec. Remulla.