NAHIRAPAN huminga ang 13 tao matapos makalanghap ng usok nang sumiklab ang sunog sa isang condominium sa Quezon City noong Lunes.

Nagsimula ang sunog sa Shanata Condominium sa Brgy. Talipapa bandang alas-4:56 ng umaga at umabot sa ikatlong alarma, ayon sa Bureau of Fire Protection (BFP).

Sinabi ng arson probers na nagmula ang apoy sa isa sa mga kuwarto sa 8th floor.

Walang nasawi ngunit 13 katao ang ginamot ng mga first responders.

Umabot sa 15 fire trucks at ilang ambulansya ang rumesponde sa sunog na naapula dakong alas-6:28 ng umaga.

Hindi alam ng mga bumbero ang dahilan ng sunog.