TALAVERA, Nueva Ecija–Kalaboso ang inabot ng 19-anyos na babae dahil sa paglabag sa Republic Act 9995 o ang Anti-Photo and Video Voyeurism Act noong Biyernes.

Ipinagbabawal sa batas na ito ang pagkuha ng mga larawan o video ng isang taong nagsasagawa ng sekswal na pagkilos o pagkuha ng larawan ng kanilang pribadong lugar nang walang pahintulot.

Ayon kay Lt. Col. Marlon Cudal, hepe ng pulisya, inaresto ang babae sa Brgy. Cabubulaunan bandang alas-1:10 ng hapon.

Inaresto ang suspek sa warrant of arrest na galing sa Presiding Judge ng Regional Trial Court Branch 88 ng Sto. Domingo, Nueva Ecija.

Samantala, isang 21-anyos na lalaki ang arestado rin para sa krimeng panggagahasa sa Brgy. Pag-asa dakong alas-2:20 ng hapon.

Walang piyansang inirekomenda ang Baloc Regional Trial Court para sa pansamantalang kalayaan ng naarestong suspek.

Nasa kustodiya ng pulisya ang dalawang naarestong suspek.