NAIPIT ang kanang kamay ng lalaking trabahador sa peanut grinder machine na nagresulta sa pagkadurog ng kanyang palasingsingan at hinlalato o ring at middle finger Huwebes ng umaga sa Taguig City.

Halos dalawang oras tumagal ang ginawang pag-rescue ng mga tauhan ng Bureau of Fire Protection-Taguig, City Disaster Risk Reduction and Management Office (CDRRMO) at mga tauhan ng Barangay Calzada bago tuluyang mahugot ang kamay ng lalaki sa grinder machine.

Sa ulat ng BFP-NCR Taguig City, natanggap nila ang tawag sa Hotline 911 hinggil sa paghingi ng saklolo ng mga kawani ng isang bodega sa Samaca 2 Road, Brgy. Calzada kaugnay sa pagkakaipit ng kamay ng biktima habang nagdudurog ng mani sa grinder machine.

Alas-10:48 ng umaga nang simulan ang pag-rescue hanggang tuluyang mahugot ang kamay ng biktima alas-12:45 ng makapananghali.

Binigyan muna ng pangunahing lunas ng 443 Ambulance Emergency Medical Service ang lalaki bago siya dinala Health Care Facility para sa agarang atensiyong medikal.